2019 йилнинг баҳор мавсумида Тошкент шаҳар ҳудудида 409 минг дона манзарали ва мевали дарахт экилиши белгиланган. Бу ҳақда Тошкент шаҳар экология ва атроф-муҳитни муҳофаза қилиш бошқармаси бошлиғи Нодир Юнусов Ўзбекистон матбуот ва ахборот агентлигида бўлиб ўтган матбуот анжуманида маълум қилди, деб хабар берди «Дарё» мухбири Севара Нишонова.
«Дарахтларни экиш режасига асосан биринчи навбатда кесилган дарахтлар ўрнига ҳамда ҳар бир дона кесилган дарахт ўрнига 10 туп дарахт экилиши йўлга қўйилган. Кўчат экилган объектларга масъулларни бириктириш, улар томонидан кўчатларни мавсум давомида парваришлаш, уларни зараркунандалардан ҳимоя қилиш ва пайхон этилишининг олдини олиш чоралари кўрилган», — дейди Нодир Юнусов.
Қайд этилишича, Экология ва атроф-муҳитни муҳофаза қилиш давлат қўмитаси ва унинг тасарруфидаги тузилмалар дарахтларни кесишга рухсат берувчи орган ҳисобланмайди, хулоса берувчи ташкилот саналади. Ушбу хулоса асосида жойлардаги маҳаллий ҳокимият органлари томонидан рухсатномалар расмийлаштирилади. Дарахтларни кесиш ваколати Ободонлаштириш бошқармасига тегишли.
Ободонлаштириш бош бошқармаси тизимидаги ихтисослаштирилган бошқармалар ва туман ободонлаштириш бошқармалари томонидан 2018 йил мобайнида 5 миллиондан ортиқ мавсумий гул кўчатлари экилди.
2019 йилда 11 миллион дона мавсумий гул кўчатлари ҳамда 18 минг дона манзарали дарахт ва бута кўчатлари экилиши режалаштирилган.
Шунингдек, Экология ва атроф-муҳитни муҳофаза қилиш давлат қўмитаси матбуот хизмати вакили Севара Давлатованинг маълум қилишича, Ўрмон хўжалиги давлат қўмитаси ва Ўзбекистон Республикаси Фанлар академияси билан ҳамкорликда 2019 йилнинг 1 июнига қадар республика ҳудудидаги барча дарахтлар хатловлардан ўтказилади.
Изоҳ (0)