28 январь куни Ўзбекистон матбуот ва ахборот агентлиги пресс-холлида «Мамлакатимизда экологик муҳитни янада яхшилаш, атроф-муҳитни муҳофаза қилиш масалалари» мавзусида матбуот анжумани бўлиб ўтди. Бу ҳақда «Дарё» мухбири Севара Нишонова хабар берди.
Анжуманда Тошкент шаҳар экология ва атроф-муҳитни муҳофаза қилиш бошқармаси мутасаддилари ОАВ ходимларини қизиқтирган саволларга жавоб берди. Ана шундай саволлардан бири 2009 йилда Амир Темур хиёбонидаги дарахтларнинг кесиб ташлангани қонуний ёки ноқонуний амалга оширилгани ҳақида бўлди.
«Дарахтларнинг кесилиши қонуний ёки ноқонунийлиги тўғрисида Суд органлари қарор чиқаради. Мен ҳозир 10 йил олдин бўлиб ўтган воқеани шарҳлаб ўтирмоқчи эмасман. Мен 2019 йилдаги маълумотлар ҳақида гапира олишим мумкин. Ўзбекистон Республикаси қонунчилигида дарахтларни ноқонуний кесиш ҳамда бунинг учун тайинланадиган маъмурий жазо чоралари аниқ-тиниқ ёзиб қўйилган. Жорий йилнинг 28 куни мобайнида прокуратурага 2 та ҳолат бўйича тақдимнома киритилди. Жумладан, ҳозирда Учтепа туманида содир этилган ҳолат юзасидан 128 млн сўмлик, Чилонзор туманида юз берган ҳолат бўйича эса 180 миллион сўмлик жарима ундириш даъвоси кўриб чиқилмоқда», – деди ушбу саволга жавобан Тошкент шаҳар экология ва атроф-муҳитни муҳофаза қилиш бошқармаси бошлиғи Нодир Юнусов.
Изоҳ (0)