Андижон вилоятининг барча шаҳар ва туманларида ҳуқуқбузарликлар профилактикаси ва жиноятчиликка қарши курашиш борасидаги ишлар самарадорлигини ошириш мақсадида «Хавфсиз хонадон», «Хавфсиз кўча», «Хавфсиз маҳалла», «Хавфсиз туман» шиори остида акция ўтказмоқда, дея хабар бермоқда вилоят ички ишлар бошқармаси матбуот хизмати.
Вилоят ҳокимлиги, «Маҳалла» жамоат фонди вилоят бўлинмаси, Ўзбекистон ёшлар иттифоқи вилоят кенгаши ва бошқа алоқадор ташкилотлар ҳамкорлигида ташкил этилган акция давомида профилактика инспекторлари, депутатлар, маҳалла раислари, ёшлар иттифоқи фаоллари уйма-уй юриб аҳолини қийнаётган масалаларни ўрганмоқда. Фуқароларга ҳуқуқшунослар томонидан маслаҳат ва тавсиялар берилмоқда.
Куни кеча Андижон вилояти прокуратураси ҳамда ички ишлар бошқармаси билан ҳамкорликда акция доирасида Андижон шаҳрида учрашув ўтказилди. Учрашув мобайнида фуқароларнинг 50 га яқин муаммоси тингланди. Айримлари жойида ҳал этилди. Шунингдек, ишсиз фуқаролар учун ташкил этилган бўш иш ўринлари меҳнат ярмаркаси давомида 30 га яқин фуқарога ишга жойлашиш учун йўлланмалар берилди.
Акция доирасидаги учрашув-мулоқотлардан яна бири эса Жалақудуқ тумани Тешиктош қишлоғининг Узункўча маҳалласида ўтказилди. Унда туман ички ишлар бўлими бошлиғи, майор Мансурбек Алиханов, «Маҳалла» жамоат фонди раиси, вилоят кенгаши депутати Садбархон Мамитовалар Янгичек, Катта йўл, Қўқон кўчаларида истиқомат қилувчи аҳоли вакилларининг электр энергияси, газ ва сув, кўчаларни асфальтлаш бўйича муаммо ва таклифларини тинглади.
— 2018 йил мобайнида барча йўналишлар бўйича жами содир этилган ҳуқуқбузарлик ва жиноятлар 145 тани ташкил этди, — дейди майор Мансурбек Алиханов. — 2017 йилга нисбатан таққослаганда уларнинг сони 62 тага, яъни 29,95 фоизга камайган. Юз берган ҳуқуқбузарлик ва жиноятларнинг асосий қисми чегара ҳудудларда кузатилган. Шу сабабли акция доирасидаги тадбирларнинг асосий қисмини чегараолди маҳаллаларда ўтказишга, фуқароларни қийнаётган муаммоларни жойида ҳал этишга ҳаракат қилмоқдамиз.
Хўжаобод туманида эса муаммолар уйма-уй юриб ўрганилмоқда. Хусусан, Нишоббўйи МФЙ, Боғ кўчасида яшовчи фуқаролар билан олиб борилган мулоқотларда асосий эътибор ишсиз фуқароларни ишга жойлаштириш бўлди.
Шу кўчада истиқомат қилувчи Насибахон Ўсмонова хонадонига кирилганда ишсиз эканлиги, агарда иш топилса, ишлаш истаги борлигини билдирди. Бандликка кўмаклашиш маркази ходимлари ёрдамида фуқаронинг мурожаатига шу ернинг ўзида ечим топилди. Эндиликда у уйидан узоқ бўлмаган ҳудудда жойлашган «Муомала барака» корхонаси синов муддати билан ишга жойлаштирилди.
Изоҳ (0)