Самарқанд шаҳридаги умумий ўрта таълим мактабларининг бири текширилганда 2 дона иситиш қозонлари табиий газ тармоғига газ ҳисоблагичсиз тўғридан-тўғри уланганлиги, 2 дона иситиш қозонларининг газ ҳисоблагич тамғалари узилган ҳолатда фойдаланиб келинганлиги аниқланган. Натижада давлат манфаатларига 56 миллион 770 минг сўм миқдорда зарар етказилган. Бу ҳақда Мажбурий ижро бюроси Самарқанд вилоят бошқармаси «Дарё» мухбири Фарҳод Норбўтаевга маълум қилди.
Мазкур ҳолат юзасидан Мажбурий ижро бюросининг Самарқанд шаҳар бўлими томонидан мактаб директори У.М.га нисбатан Ўзбекистон Жиноят Кодексининг 185/2-моддаси (Электр, иссиқлик энергияси, газ, водопроводдан фойдаланиш қоидаларини бузиш) 2-қисми билан жиноят иши қўзғатилган. Ушбу модда бўйича айбдор деб топилган шахсга энг енгил жазо энг кам ойлик иш ҳақининг 75 баравари миқдорида жарима, энг оғир жазо 1 йилгача озодликдан маҳрум қилиш бўлиши мумкин.
Мажбурий ижро бюроси Самарқанд вилоят бошқармаси Қўшработ туман электр тармоқлари корхонасига қарашли участкаларнинг биридаги ходим Ғ.Қ. ўзининг хизмат ваколатларига кирмайдиган ишларга қўл ургани ҳақида маълум қилди.
Мажбурий ижро бюроси Самарқанд вилояти Қўшработ туман бўлими ходимлари томонидан фуқаро Ғ.Э.нинг мурожаати ўрганилган. Унда Ғ.Э. ўзига тегишли бўлган тикув цехини уч фазали электр тармоғига улаш эвазига Ғ.Қ. ундан 400 минг сўм пул олганини маълум қилган. Кейинроқ Ғ.Қ. электр тармоқлари корхонаси балансида бўлган «ТЕ-73» маркали 100 амперли электрон ҳисоблагични, наряд ҳужжатларисиз ўрнатиб бериб, ҳужжатларини тўғрилаб бериш ва ҳисоблагични электрон базага киритиш эвазига 500 минг сўм олган. Ғ.Қ. фуқародан олинган жами 900 минг сўм пулларни ўз эҳтиёжлари учун ишлатиб юборган.
Мазкур ҳолат юзасидан Мажбурий ижро бюросининг Қўшработ туман бўлими томонидан Қўшработ туман электр таъминоти корхонасига қарашли участка ходими Ғ.Қ.га нисбатан Жиноят Кодексининг 168-моддаси (Фирибгарлик) 1-қисми билан жиноят иши қўзғатилган. Ушбу модда бўйича айбдор деб топилган шахс учун энг енгил жазо энг кам иш ҳақининг 50 баравари миқдоридаги жарима, энг оғири 3 йилгача озодликдан маҳрум қилиш ҳисобланади.
Изоҳ (0)