24 январь куни Қашқадарё вилоятининг Қарши туманидаги «Чаман» маҳалласида Ўзбекистон–Жанубий Корея ҳамкорлигидаги «CENTURY-JV» қўшма корхонасининг тамалтоши қўйилди. Жанубий Корея билан ҳамкорликда ташкил этилиши мўлжалланган корхонада импорт ўрнини босадиган 20 турдаги маиший техника воситалари ишлаб чиқарилади.
Жанубий кореялик ишбилармонлар билан биргаликда янги корхона ташкил этиб, халқимиз эҳтиёжи учун мўлжалланган маиший техника воситалари ишлаб чиқаришни мақсад қилганмиз. Биз корхона биносини қурамиз, жанубий кореялик ҳамкорлар эса жиҳозлаш ишларини бажаришади. Корхона ишга тушгач, 20 турдаги маиший техника воситалари ишлаб чиқарилиш баробарида ҳар бир маҳсулотнинг 10 дан ортиқ хили ҳам ишлаб чиқарилиши мўлжалланган. Масалан иситиш ускунасини олсак, унинг ҳам 10 дан ортиқ хили тайёрланиб, истеъмоличлар эътиборига ҳавола қилинади.Улуғбек Эшов, «Габарит кенглик» МЧЖ раҳбари
Маълум бўлишича, лойиҳада корхонадан ташқари Жанубий Корея андозаси асосида 50 ўринли меҳмонхона, замонавий савдо маркази, ўқув маркази ҳамда 150 ўринли болалар боғчаси ҳам қуриш кўзда тутилган. Лойиҳа қиймати 6 миллион доллар бўлиб, шундан 5 миллион доллари тўғридан-тўғри хорижий инвестицияни ташкил этади.
Маълумот ўрнида шуни таъкидлаб ўтиш жоизки, жанубий кореялик ишбилармонлар билан ҳамкорликда Фарғона вилоятида ҳам «Listen» номли қўшма корхона барпо этилган бўлиб, корхона март ойида ишга тушиши мўлжалланган. Қўшма корхонада 5 турдаги тиббий анжомлар ишлаб чиқарилиши кўзда тутилган.
Изоҳ (0)