Икки фарзандини ўлдирган самарқандлик аёл, оширилиши режалаштирилаётган пенсия ёши, музлаган Ниагара ва куннинг бошқа муҳим хабарлари

24 январнинг эътиборга молик хабарлари — «Дарё» дайжестида.

Самарқандда эрининг жияни билан ишқий муносабати ошкор бўлган аёл икки фарзандини ўлдирди.

Маълум бўлишича, турмуш ўртоғи ишлаш мақсадида Россияга кетган аёл эрининг жияни Маъмур Илашев билан ишқий муносабатда бўлган. Бу муносабатлардан қайнотаси ҳамда бошқалар хабар топганидан қўрқиб, вояга етмаган фарзандлари — 2011 йилда ва 2017 йилда туғилган икки қизини ухлаб ётганида пичоқлайди.

***

Ўзбекистонда пенсия ёши оширилиши мумкин.

Ҳозир бу масала устида ўйлаяпмиз, бизга концепцияни 2020 йил январь ойигача тугатиш борасида Президент томонидан топшириқ берилган. Биз бу масалани ўрганамиз, якуний концепция лойиҳасида пенсия ёшини оширамизми ёки босқичма-босқич оширамизми, бу масала албатта, кўриб чиқилади», — дея тушунтирди Пенсия жамғармаси ижро этувчи аппарати бўлим бошлиғи Шуҳрат Ўтаганов.

***

АҚШда Ниагара шаршараси совуқ сабабли музлаб қолди.

Музлашга шу ҳудудга ёпирилган қор бўрони сабаб бўлган бўлиши мумкин. 22 январь куни у ерда ҳаво ҳарорати Цельсий шкаласи бўйича минус 20 даражагача пасайган. Совуқ шамол ҳудудда яна икки ҳафта давомида сақланиб туради.

***

Ўзбекистонда енгил автомобиллар импорти икки баробарга ўсди.

Агар 2017 йилда Ўзбекистон импорт автомобилларига 155 миллион АҚШ доллар сарфлаган бўлса, 2018 йилда бу кўрсаткич 319 миллион АҚШ долларга етган.

Таққослаш учун 2016 йилда ушбу кўрсаткич 193 миллион АҚШ долларни, 2015 йилда 120 миллион АҚШ долларни, 2014 йилда эса —212 миллион АҚШ долларни ташкил қилган.

***

Тахтдан воз кечган Малайзия қироли «Москва гўзали» билан ажрашмоқчи.

Малайзия қироли ва Воеводина ҳис-туйғулари «совуб қолгани» ва тез-тез жанжаллашиб қолаётгани сабаб ажрашишга қарор қилган. Ҳозирда томонларнинг вакиллари ажрим жараёни бошлаш учун зарур ҳужжатларни тайёрламоқда.

Аввалроқ, Муҳаммад V «Москва гўзали»га уйлангач, тахтдан воз кечгани ҳақида хабар берилган эди.

Бироз вақт ўтиб, эр-хотиннинг чақалоқ кутаётгани маълум бўлган.

Малайзиянинг янги қироли этиб эса Паханг штати ҳукмдори султон Абдулла Султон Аҳмад Шоҳ сайланди.