Молия вазирлиги ҳузуридаги Бюджетдан ташқари Пенсия жамғармасида ўтказилган матбуот анжуманида келгусидаги режалар хусусида ҳам сўз юритилди. Бу ҳақда ЎзА хабар берди.
Пенсия тизимига дунё стандартларини жорий этиш борасида ривожланган давлатлар тажрибаси ўрганилмоқда. Бунда Жаҳон банки билан яқин ҳамкорлик қилинмоқда.
Дунё давлатлари орасида Дания, Польшада йўлга қўйилган тизим мақтовга арзигулик. Аммо, мамлакатлар аҳолиси, уларнинг қарашлари бир-бирига юз фоиз ўхшамагани каби пенсия тизимини татбиқ этишда ҳам фарқ бўлиши табиий. Ҳозирда Чехия, Жанубий Корея, Россия каби давлатлар билан тажриба алмашиш жараёни кечмоқда.
— Илғор тизимларни ўрганиш жараёнида баъзи бир таклифлар ҳам ишлаб чиқилмоқда, — дейди Пенсия жамғармаси ижро этувчи директори Ёрқин Турсунов. — Улар жорий йилнинг охиригача тайёр бўлади. Мисол учун, оилада фақат эркак ишлайди, хотин эса уй бекаси. Келгусида аёл ҳам пенсияга чиқиши керак. Бунинг учун эр ҳар йили ЭКИҲ 50 фоизи миқдорида бадал тўласа, аёл учун пенсия ҳисоблашга асос бўлади. Бундай амалиёт Японияда мажбурий экан. Биз эса уни оила раҳбари учун ихтиёрий қилиб қўймоқчимиз.
Яна битта янгилик режалаштирилмоқда. Одатда эркаклар пенсияга чиқиш учун 25 йиллик стажга эга бўлиши керак. Лекин у пенсия ёшига етганда 23 йиллик стажга эга бўлди. Унга имтиёз сифатида етмаётган икки йил учун ЭКИҲ миқдорида маблағ тўлаш таклиф этилади. Лекин пенсия учун стаж сотиб олиш миқдори беш йилдан кўп бўлиши мумкин эмас.
Маълумот учун, Ўзбекистонда бугунги кунда 3,1 миллион пенсионер бор.
Изоҳ (0)