Бандлик ва меҳнат муносабатлари вазири ўринбосари Баҳодир Умурзоқов «Хоразмда пенсия ёшига тўлган ўнлаб муаллим ишдан озод этилди» деган хабарни ўқигач зудлик билан вилоят бош давлат меҳнат инспектори Бахтиёр Ибрагимов билан боғланганини билдирган. Бу ҳақда ЎзА хабар берди.
Бахтиёр Ибрагимовдан келган тезкор ахборотга биноан, 2018 йилнинг 22 декабридан 2019 йил 17 январигача бўлган даврда Хива шаҳри, Янгибозор ва Боғот туманларидаги мактабларда пенсия ёшидаги 8 нафар муаллим ва 9 нафар ўрта махсус билимга эга мутахассис билан янги меҳнат шартномаси тузилган. Улар мактабларда меҳнат фаолиятини олиб бормоқда.
Вазир ўринбосарига кўра, бошқа ҳудудларда мактаб, мактаб ёшигача бўлган тарбия муассасаларда бирорта пенсия ёшидаги муаллим ёки тарбиячи маъмурият ташаббуси билан ишдан озод қилинди деган маълумот шу пайтгача вазирликка келгани йўқ.
Қайд этиш жоизки, иқтисодиётнинг бошқа соҳаларида ҳам яқин давр ичида 182 минг яқин ёшга доир пенсиядаги олий ва ўрта махсус маълумотли, бой тажрибага эга педагог, тарбиячи, шифокор ва ҳамшира меҳнат фаолиятига қайтиши кутилмоқда.
2019 йилнинг 1 январидан меҳнат билан банд бўлган пенсионерларга пенсия тўловлари 100 фоиз тўланиши давлат меҳнат назорати хизматининг доимий эътиборида.
Пенсионерларни иш берувчи ташаббуси билан ишдан озод қилиш, жумладан, мактаб, мактабгача тарбия ҳамда тиббий-профилактика муассасалари, мулк шаклидан қатъий назар иқтисодиётнинг бошқа соҳалари корхоналари, фирмалари ва ташкилотларида Меҳнат Кодексининг 100-моддаси, 2-қисми 7-бандидаги талабларга мувофиқ пенсия ёшидагиларнинг соғлиғи, меҳнат қилиш иштиёқи даражасини ҳисобга олиб, уларни енгилроқ иш билан таъминлашни касаба уюшмаси розилиги билан ҳал этиш тавсия қилинади.
Барча ҳолатларда ишлаб турган пенсионерларни асоссиз равишда раҳбарият ташаббуси билан ишдан озод қилган иш берувчиларга нисбатан минимал маош миқдорининг 10 каррасидан 100 каррагача жаримага тортиш борасида огоҳлантириш берилмоқда.
Изоҳ (0)