MMA бўйича жаҳон чемпиони, россиялик жангчи Ҳабиб Нурмагомедов ирландиялик Конор Макгрегор билан ўтказилиши мумкин бўлган реванш жанги ҳақида фикр билдирди. Бу ҳақда TMZ хабар берди.
«Нима учун Конор билан қайта жанг қилишим керак? Сўнгги жанг олдидан у жуда кўп гапириб юборди. Аммо октагонга чиққанда унинг қўлидан ҳеч нима келмади», — деди Нурмагомедов.
12 январь куни россиялик жангчи ўзининг Instagram саҳифасида Макгрегорни оғриқли усулда енгган ҳолати тасвирланган видеони жойлаштирди ва унга «ҳаётидаги шармандали» воқеани яна бир бор ёдига солди.
Эслатиб ўтамиз, 2018 йилнинг октябрь ойида Ҳабиб Конор билан кечган жангда ғалаба қозонди. Жангдан сўнг жанжал юзага келди. Натижада иккала спортчи ҳам номаълум муддатга дисквалификация қилинди ва улар ҳозирда ўз санкциясини кутмоқда.
Нурмагомедов MMA қоидалари бўйича кечган жангларда бирор марта ҳам мағлубиятга учрамаган. Унинг ҳисобида 27 та ғалаба мавжуд.
Макгрегор эса фаолияти давомида 25 та жанг ўтказиб, 21 тасида ғалаба қозонган ва 4 марта мағлуб бўлган.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @daryo_sport’га обуна бўлинг!
Изоҳ (0)