«Ўзбекистон темир йўллари» АЖ томонидан 12-сонли Бухоро—Хива тезюрар йўловчи поезди қатнови йўлга қўйилди, деб хабар бермоқда ЎзА.
Бухоро темир йўл вокзалидан ҳаракатланган поезд 13 та вагондан иборат. Шунингдек, йўловчиларга юқори даражада сервис хизмат кўрсатиш мақсадида ресторан-вагон ҳам жорий этилган.
Вагонлар «Тошкент йўловчи вагонларини қуриш ва таъмирлаш заводи» АЖ томонидан ишлаб чиқарилган.
Белгиланган ҳаракат жадвалига кўра поезд бугундан бошлаб, Бухоро—Хива йўналишида ойнинг тоқ саналарида, соат 12:05 да Бухоро вокзалидан ҳаракатланади ва шу куни соат 17:50 да Хива вокзалига етиб боради.
Хива—Бухоро йўналишида эса ойнинг жуфт саналарида, соат 08:45 да Хива вокзалидан ҳаракатланиб, шу куни соат 14:48 да Бухоро вокзалига етиб келади.
Хабарда айтилишича, Самарқанд, Қарши, Бухоро ҳамда Шаҳрисабз шаҳарларига мунтазам қатнови йўлга қўйилган «Афросиёб» юқори тезликда ҳаракатланувчи электропоездлари, кейинчалик Хива шаҳрига ҳам ҳаракатланиши кўзда тутилган.
Изоҳ (0)