14 январь – Ватан ҳимоячилари куни байрами арафасида Андижон вилояти ҳокими, ҳарбий-маъмурий сектор раҳбари Шуҳратбек Абдураҳмонов ўз хизмат вазифасини ўтаётган вақтда ҳалоқ бўлган, Избоскан тумани ИИБ жиноят қидирув бўлинмаси тезкор вакили Илҳомжон Ҳайдаров хонадонига ташриф буюрди. Бу ҳақда «Дарё»га журналист Умиджон Мамарасулов хабар бермоқда.
Вилоят раҳбари Илҳомжон Ҳайдаровнинг ота-онаси Иномжон ака ва Моҳирахон опага ҳамдардлигини билдириб, ўғли Ўзбекистон Республикаси Президентининг 2019 йил 11 январдаги Фармони билан вафотидан сўнг «Жасорат» медали билан тақдирланганини, шундай мард ва жасур фарзандни вояга етказганлари учун давлат раҳбари улардан миннатдорлигини етказди. Сўнгра ватан учун фидоийлик кўрсатган инсонлар ҳамиша юрт ардоғида бўлиши, уларнинг қаҳрамонликлари унутилмаслиги, яқинлари давлатимизнинг қўллаб-қувватловида эканлигини таъкидлаб, медални ўз эгаларига топширди.
– Ўғлим болалигидан ҳуқуқ-тартибот идораларида ишлашга қизиқарди, — дея хотирлайди Иномжон ака. – Таълим олиш мобайнида ҳам шу соҳага яқин йўналишларини танлади. Мактаб ва академик лицейда аъло баҳоларга ўқиди. Ҳарбий хизматни ўтагач, йўлланма билан қайтиб келиб, Ички ишлар вазирлиги академиясига ўқишга кирди. 2015 йилда у ерни тамомлагач Андижон тумани ички ишлар бўлимида меҳнат фаолиятини бошлади. Ўтган йилнинг январидан Избоскан тумани ички ишлар бўлими жиноят қидирув бўлинмаси тезкор вакили сифатида иш олиб бораётган эди.
– 21 ноябрь куни укасининг туғилган куни эди, — деб хотирлайди онаси Моҳирахон опа Ҳайдарова. – Биргаликда нишонлаш ниятида эдик. Оқшомга яқин унга телефон қилиб, «келасанми?», деб сўрадим. «Ҳаракат қиламан, лекин ишларим кўп», деди. Ўша куни ярим тунга қадар кута-кута туғилган кунни ҳам ўтказдик. Эртасига тонгни қайғули хабар билан қарши олдик.
Фожиа 2018 йил 22 ноябрь куни соат 02:00 ларда Избоскан тумани «Юқори Чувама» маҳалла фуқаролари йиғини ҳудудида юз берган. Шу куни Илҳомжон Ҳайдаров ҳамкасби С. Я. билан бирга хизмат олиб бораётган вақтида бир гуруҳ фуқароларнинг шахсини аниқлаш мақсадида тўхтатганларида улар томонидан қаршиликка дуч келган. Қонуний талабга бўйсунмаганлардан бири А.Ж. фаол қаршилик кўрсатиб, телефон орқали укаси С.Ж. ва жияни З.Қ.ни ҳодиса жойига чақириб, улар билан бирга С.Я. ва Илҳом Ҳайдаровни калтаклайди. Муштлашув оқибатида икки ходим шифохонага ётқизилган. Кўрсатилган шошилинч тиббий ёрдамга қарамасдан оғир жароҳат олган Илҳомжон шифохонада вафот этган.
Гумондорлар ўша пайтда қўлга олинган. Вилоят прокуратураси томонидан уларга нисбатан Ўзбекистон Жиноят кодексининг 97-моддаси (қасддан одам ўлдириш) 2-қисми «г», «л», «п» бандлари билан жиноят иши қўзғатилган.
Жиноят ишлари бўйича туман суди берган маълумотларга кўра, ҳодиса юзасидан тергов ва суриштирув ишлари ҳали олиб борилмоқда.
Изоҳ (0)