2018 йилнинг 13 декабрида Ўзбекистон истеъмолчилар ҳуқуқларини ҳимоя қилиш жамиятлари федерацияси ва Корея Республикаси истеъмолчилар агентлиги ўртасида ҳамкорлик меморандуми имзоланган эди. Мазкур ҳужжатга мувофиқ, икки мамлакат истеъмолчиларининг ҳуқуқлари муҳофазаси истеъмолчилар ҳуқуқини ҳимоя қилувчи ҳар иккала ташкилот ҳамкорлиги доирасида амалга оширилади. Бу ҳақда ЎзА хабар берди.
Эндиликда Ўзбекистон ҳудудида бўлган Корея Республикаси фуқаролари таклиф, шикоят ва ариза билан Ўзбекистон истеъмолчилар ҳуқуқларини ҳимоя қилиш жамиятлари федерациясининг 1091 «ишонч телефони»га ёки www.istemol.uz электрон манзилига мурожаат қилишлари мумкин.
Худди шу каби Корея Республикасида ишлаётган, таълим олаётган ёки бу мамлакатга сайёҳ сифатида борган юртдошлар истеъмолчи сифатида – у савдо ёки хизмат кўрсатиш соҳасида бўлишидан қатъи назар, ҳуқуқлари бузилган ҳолатларда Корея истеъмолчилар агентлигининг +82-43-880-5400 «ишонч телефони»га ёки crossborder@kca.kr электрон манзилига мурожаат қилишлари мумкин.
Бундай амалиёт муқаддам қонунчилик даражасида кўриб чиқиш имконияти бўлмаган, асосан икки мамлакат сайёҳларига кўп миқдорда зарар етказиши, шунингдек мамлакатнинг туризм салоҳияти ва нуфузига салбий таъсир кўрсатиши мумкин бўлган муаммоларга ўз вақтида ечим топишга ёрдам беради.
Изоҳ (0)