Кармана тумани давлат солиқ инспекцияси ходими С.Н. жиноий қилмиши учун қўлга олинди. Бу ҳақда Навоий вилояти ИИБ матбуот хизмати раҳбари Ўктам Усмонов маълум қилди, дея хабар беради «Халқ сўзи».
Туманнинг «Катта Мачит» маҳалла фуқаролар йиғинида истиқомат қилувчи Ҳ. Остонова бобоси Р. Остоновга тегишли бўлган ҳовли-жойнинг кадастр хужжатларини тайёрлатиш мақсадида эди. Шу боис уйнинг мол-мулк ва ер солиғидан қарздорлиги йўқлиги тўғрисида маълумотнома олишига тўғри келади ва бунинг учун туман давлат солиқ инспекциясига мурожаат қилади. Ҳужжатларни ўрганган туман ДСИ ходими С.Н. унга уйнинг мол-мулк ҳамда ер солиғидан 1 миллион 300 минг сўм қарздорлиги борлигини билдиради.
Солиқ идораси инспектори вазиятдан унумли фойдаланиб қолишни кўнглига тугиб, Ҳ. Остоновага «осон» йўлни таклиф этади. Яъни 650 минг сўм эвазига қарздорликни йўққа чиқариб бериши ва шу тўғрисида маълумотнома расмийлаштиришини айтади. Агар нақд пули бўлмаса, келишилган маблағни Click ёки Payme иловалари орқали пластик карточкасига ташлаши мумкинлигини ҳам тушунтиради.
Навоий вилояти ИИБ жиноят қидирув бошқармаси ходимлари томонидан олиб борилган тезкор тадбир давомида Кармана тумани ДСИ инспектори қўлга олинди. Айни пайтда мазкур ҳолат бўйича тергов жараёнлари давом этмоқда.
Изоҳ (0)