Президент қарорлари ижроси юзасидан Бош прокуратура томонидан тизимли назорат амалга оширилмоқда. Бу ҳақда ЎзА хабар бермоқда.
Ўтган йилда Президент қарорлари ижроси барча ҳудудларга чиққан ҳолда ўрганилиб, уларни ижтимоий-иқтисодий ривожлантиришда муҳим аҳамият касб этган 216 қарор ва топшириқлар ижроси бажарилиши таъминланди.
Мазкур текширишлар давомида асосий эътибор қарор ва топшириқларининг ўз вақтида, тўлиқ ва сифатли ижро этилишига ҳамда мансабдор шахсларнинг масъулиятини янада оширишга қаратилди.
Бош прокуратура матбуот хизмати хабарига кўра, текширишлар натижасида 343 нафар мансабдор шахс интизомий ва маъмурий жавобгарликка тортилди. Қўпол қонун бузилиши ҳолатлари юзасидан 8 жиноят иши қўзғатилди.
Шу билан бирга, 144 тадбиркорлик субъектига 114,5 миллиард сўм ва 281,3 миллион АҚШ доллари миқдорида кредит маблағи, тадбиркорлик фаолияти билан шуғулланиш учун 1121 гектар ер майдони ажратилиши таъминланди. 126 қишлоқ хўжалиги техника ва агрегатлари етказиб берилиши, 26 миллиард сўм, 1,9 миллион АҚШ доллари ва 2,5 миллион евро миқдордаги кредит маблағларининг қайтариш муддатини узайтиришга амалий ёрдам кўрсатилди.
Шунингдек, ҳудудларни ижтимоий-иқтисодий ривожлантириш тадбирларини амалга ошириш учун 89 миллиард сўм миқдоридаги пул маблағи ажратилиши таъминланди.
Изоҳ (0)