Ўзбекистон ёшлар иттифоқи Марказий кенгашида «Ҳарбий қисмлардаги энг намунали бошланғич ташкилоти» танловининг республика босқичи ўтказилди. Унда танловнинг ҳудудий босқичларида ғолибликни қўлга киритган 14 нафар иштирокчи ўзаро баҳс олиб борди. Бу ҳақда «Дарё»га Ёшлар медиа маркази маълум қилди.
Марказий кенгаш, Қуролли Кучлар тизимидаги вазирлик ва идораларнинг вакилларидан тузилган ҳакамлар ҳайъати танловнинг республика босқичи иштирокчиларини баҳолаб, мутлақ ғолибларни аниқлаб берди.
—Бошланғич ташкилот етакчисининг 2018 йил давомида амалга оширган ишлари 20, ижтимоий-сиёсий, ҳуқуқий ва маънавий саводхонлиги 30, нотиқлик санъати ва ёшларни ўз ортидан эргаштира олиш қобилияти 30 ва янги амалга оширадиган лойиҳасининг тақдимоти 20 баллгача, жами 100 баллик мезонда баҳоланади, – дейди етакчилар кенгаши раиси Сардорбек Абдусамадов.
Танловда 1-ўринни Фарғона вилоятидаги ҳарбий қисм бошланғич ташкилот етакчиси Зиёдилла Тиллахўжаев, 2-ўринни Тошкент вилоятидаги ҳарбий қисм бошланғич ташкилот етакчиси Анвар Қутлимуродов, 3-ўринни Хоразм вилоятидаги ҳарбий қисм бошланғич ташкилот етакчиси Жўра Раҳматов ва Бухоро вилоятидаги ҳарбий қисм бошланғич ташкилот етакчиси Аҳад Маҳкамов эгаллади.
Маълумот учун, Республика босқичида 1-ўринни қўлга киритган бошланғич ташкилотлар етакчилари номзоди «Ўзбекистон белгиси» кўкрак нишони ва бошқа давлат мукофотларига тавсия этилади.
Изоҳ (0)