Фарғонада 2018 йилда вилоят иқтисодиётига 152,7 миллион доллар миқдоридаги тўғридан-тўғри хорижий инвестиция маблағлари жалб этилди. Бу 2017 йилда ўзлаштирилган инвестицияларга нисбатан 3,2 баробар кўпдир. Бу ҳақда «Дарё»га вилоят ҳокимлиги матбуот хизмати маълум қилди.
Жорий йилда тўғридан-тўғри хорижий инвестициялар ҳисобидан Фарғона вилоятида 105 миллион долларлик 13 та лойиҳани амалга ошириш, мавжуд имкониятлар асосида уларнинг салмоғини кўпайтириш, кўплаб давлатлар билан ҳамкорликни йўлга қўйишга алоҳида эътибор қаратилмоқда.
Ўтган йили вилоят иқтисодиёти тармоқлари ва ҳудудларига инвестициялар киритиш ҳажмини кенгайтириш бўйича 20 дан ортиқ ташрифлар амалга оширилди.
2018 йил 12–14 июль кунлари Фарғона вилояти делегациясининг Хитойга ташрифи давомида қиймати 407,2 миллион доллар миқдоридаги меморандум имзоланди. Мазкур ҳамкорлик битимларида қурилиш моллари ишлаб чиқариш, автомобиль саноати учун зарур бутловчи қисмлар ишлаб чиқариш, кимё ва нефть маҳсулотларини иккиламчи қайта ишлаш орқали сулфат, полимер ва углерод ишлаб чиқариш, чинни буюмлар ишлаб чиқариш соҳасидаги лойиҳаларни амалга ошириш режалаштирилган.
Айни пайтга қадар мазкур келишувлар асосида бир қатор лойиҳалар амалга оширилди. Хитойнинг The Urumqi Silk Road Power Trading компаниясининг 3,4 миллион доллар миқдоридаги инвестиция маблағи ўзлаштирилиши эвазига автомобиллар учун газ баллони ва бутловчи қисмлар ишлаб чиқариш ҳамда Zibo Herui China компаниясининг 2,3 миллион доллар миқдоридаги инвестиция маблағларини ўзлаштириш эвазига кафел ишлаб чиқариш лойиҳалари ишга туширилди.
Вилоят ҳокими бошчилигидаги делегациянинг 2018 йил 23–26 июль кунлари Кореяга хизмат сафари натижасида Фарғона вилояти ва «Инчеон» эркин иқтисодий зонаси ўртасида ҳамкорлик меморандуми имзоланди. Ўзбекистоннинг Кореядаги элчихонаси кўмагида 222,5 миллион доллар қийматида 8 та қўшма инвестицион лойиҳани амалга ошириш бўйича бошланғич келишувларга эришилди.
Жанубий Кореянинг илғор компаниялари билан ҳамкорликда Фарғона шаҳридаги «Винчемикал» қўшма корхонасида қиймати 2 миллион доллар бўлган, қурилиш материаллари саноатида Ўрта Осиёда ягона термо изоляцион обойлар ишлаб чиқариш ҳамда «Листем Фергана» қўшма корхонасида рентген аппаратлари ишлаб чиқариш бўйича қиймати 8 миллион долларлик лойиҳа ишга туширилмоқда.
Изоҳ (0)