Самарқанд вилоятининг Булунғур туманида жойлашган «Юқори Нуқта» ЙПХ маскани яқинида, Самарқанд вилоят ИИБ Жиноят қидирув бўлими Гиёҳвандлик воситалари билан қонунга хилоф равишда муомала қилишга қарши курашиш бўлими ходимлари ҳамда вилоят ДХХ ходимлари билан ҳамкорликда ўтказилган тезкор тадбир натижасида фуқаро В.А. 3.000 доллар эвазига 203 грамм опий гиёҳвандлик воситасини сотаётган вақтида қўлга олинган. Бу ҳақда «Дарё» мухбири Фарҳод Норбўтаев хабар бермоқда.
Тадбир давомида В.А. бошқарувидаги Mercedes-Benz русумли автомашина салонидан 210 грамм опий гиёҳвандлик воситаси топилиб, ашёвий далил сифатида олиб қўйилган. Ўтказилган тезкор-қидирув тадбирлари натижасида жами 413 грамм опий гиёҳвандлик воситаси олиниб, ҳозирда ашёвий далил манбасини аниқлашга қаратилган тезкор ишлар давом этмоқда.
Самарқанд вилоят ИИБ матбуот хизматининг маълум қилишича, мазкур ҳолат бўйича вилоят ИИБ Эксперт криминалист бўлимининг 989-сонли маълумотномасига кўра 198,31 грамм ва 990-сонли маълумотномасига кўра 196,73 грамм опий гиёҳвандлик моддалари эканлиги аниқланган. Жами бўлиб 395,04 грамм оғирликдаги «опий» гиёҳвандлик моддаси олинган.
Мазкур ҳолат юзасидан Ўзбекистон Республикаси Жиноят Кодексининг 273-моддаси (Гиёҳвандлик воситалари, уларнинг аналоглари ёки психотроп моддаларни ўтказиш мақсадини кўзлаб қонунга хилоф равишда тайёрлаш, олиш, сақлаш ва бошқа ҳаракатлар қилиш, шунингдек уларни қонунга хилоф равишда ўтказиш) 5-қисми билан жиноят иши қўзғатилиб тергов ҳаракатлари давом эттирилмоқда. Ушбу модда бўйича айбдор деб топилган шахс 10 йилдан 20 йилгача озодликдан маҳрум қилиниши мумкин.
Изоҳ (0)