«Asia tour Elite» ўзбек компанияси томонидан «Зангиота термал соғломлаштириш мажмуаси» лойиҳасини амалга оширишга бельгиялик маслаҳатчи жалб қилинади. Бу ҳақда Ташқи ишлар вазирлиги матбуот хизмати хабар берди.
Хорижий маслаҳатчини жалб қилиш бўйича келишув 2019 йилнинг 5 январь куни Ўзбекистон Республикасининг Бенилюкс мамлакатларидаги элчихонасида имзоланган.
Келишув доирасида маслаҳатчига туристик мажмуани қуришда йирик халқаро инвесторни аниқлаш, шунингдек инвестицион меморандум бўйича мажмуавий хизматлар кўрсатиш, юридик ҳужжатларни ишлаб чиқишда кўмак кўрсатиш каби вазифалар юклатилган.
Зангиота термал соғломлаштириш мажмуаси Ўзбекистондаги йирик соғломлаштириш SPA мажмуаси бўлади.
Унинг хизматларидан нафақат Ўзбекистон балки қўшни давлат фуқаролари ҳам фойдаланиши кўзда тутилган. Лойиҳа санатор типидаги 400 ўринли меҳмонхона, соғломлаштириш муолажаларни кўрсатишга мўлжалланган мажмуа қурилишини ўз ичига олади.
Изоҳ (0)