Қора денгизга НАТОнинг яна бир ҳарбий кемаси киритилади

НАТОнинг амалдаги доимий гуруҳларидан бири бўлган Нидерландиянинг ҳарбий кемаси Қора денгизга киришни режалаштирмоқда. Бу ҳақда НАТОнинг Украина миссияси бошлиғи Вадим Пристайко украин телеканалларидан бирига 9 январь куни берган интервьюсида эълон қилган. Бу ҳақда «Корреспондент.net» хабар қилди.

«Ҳозирда фаолият юритаётган гуруҳлар мавжуд. Масалан, шундай гуруҳлардан бири Нидерландия. Унинг кемаси фақатгина бошқарувни ўз бўйнига олди ва ҳозирда Қора денгизга киришга тайёрланяпти,» – дейди элчи.

Пристайко ҳарбий кемалар Қора денгизга тез-тез киришини таъкидлаб ўтган.

«Халқаро кема қатновини тартибга солувчи конвенция (Монтре конвенцияси) Қора денгиз атрофида жойлашмаган давлатлар учун унинг бўғозларидан ўтувчи ҳарбий кемалар сони ва юк сиғимига чеклов қўйиши керак. Шунингдек, улар қанча муддат Қора денгиз ҳудудида қолиши мумкинлигини ҳам белгилаб бериши керак,» – дейди Пристайко.

Пристайконинг сўзларига кўра, НАТО кемалар ротацион (айланиш) тамойилидан фойдаланмоқчи. Яъни, бир кема бўғозга кириб келиши билан бошқаси чиқиб кетиши керак.

Аввалроқ, АҚШ ҳарбий денгиз хизмати десант кемаси Fort McHenry Қора денгизнинг Констанцу румин портига кириб келган.

Шунингдек, Туркия ҳукумати 8 январь куни Киeв вақти билан соат 10:50да қор ёғгани сабаб, Босфор бўғозида кемалар қатновини тўхтатиб қўйди.