Сармишсой, Хонбанди, Зараутсой қоятош расмлари ЮНЕСКОнинг Умумжаҳон мероси рўйхатига киритилади. Бу ҳақда Ўзбекистон Республикаси Маданият вазирлиги томонидан 2018 йил давомида соҳада амалга оширилган ишлар ва 2019 йилда кўзланган режалар юзасидан ўтказилган анжуманда маълумот берилди, деб ёзади «Халқ сўзи».
Бу борадаги ишлар Миллий маданиятни янада ривожлантириш Концепциясини амалга ошириш бўйича 2019—2020 йилларга мўлжалланган «йўл харитаси»да ўз аксини топган.
Таъкидланганидек, халқнинг умуммиллий бойлиги бўлган маданий меросни муҳофаза қилиш, илмий ўрганиш ва ундан фойдаланиш борасида қатор ишлар амалга оширилмоқда. Хусусан, Бухоро, Самарқанд, Хива ва Шаҳрисабз шаҳарларининг тарихий марказлари ЮНЕСКОнинг Умумжаҳон маданий мероси рўйхатига, «Бойсун маданий муҳити», «Шашмақом мусиқаси», «Наврўз», «Катта ашула», «Аския», «Палов маданияти ва анъаналари» номзодлари Инсоният номоддий маданий мероси репрезентатив рўйхатига, Усмон Қуръони, Абу Райҳон Беруний номидаги Шарқшунослик институтининг қўлёзмалар тўплами, Хива хонлиги девонхонаси ҳужжатлари Жаҳон хотираси рўйхатига киритилгани юртимиз маданий меросининг дунё миқёсида эътироф этилганига ёрқин мисол бўла олади.
Моддий маданий мерос объектларини муҳофаза қилиш, илмий ўрганиш, улардан оқилона фойдаланиш ва мамлакатнинг сайёҳлик салоҳиятини оширишда уларнинг ўрни ва аҳамиятини ошириш ҳамда моддий маданий мерос соҳасидаги давлат назоратини тубдан такомиллаштириш мақсадида вазирликнинг Маданий мерос объектларини муҳофаза қилиш ва улардан фойдаланиш илмий-ишлаб чиқариш бош бошқармаси ҳамда унинг минтақавий давлат инспекциялари негизида Ўзбекистон Республикаси Маданият вазирлиги ҳузуридаги Маданий мерос департаменти ҳамда унинг Қорақалпоғистон Республикаси, вилоятлар ва Тошкент шаҳар бошқармалари ташкил этилиши кўзда тутилган.
Халқаро ташкилотлар билан ҳамкорлик изчил давом эттирилади. Яқин келажакда Ўзбекистондаги Сармишсой, Хонбанди, Зараутсой қоятош расмлари билан бирга «Саҳродаги қасрлар», «Қадимий Термиз» объэктларини ЮНЕСКОнинг Умумжаҳон мероси рўйхатига киритиш чораларини кўрилади. Шунингдек, мамлакат тарихи ва маданиятига оид хорижий давлатлардаги номоддий маданий мерос элементларини ёзиб олиш, улар асосида «Ўзбекистон номоддий маданий мероси» тўпламини нашр этиш, авлоддан-авлодга ўтиб келаётган миллий мусиқа асарлари орасидан маданий қимматга эгаларини саралаб, миллий мусиқий асарлар фонотекасини яратиш режалаштирилган.
Изоҳ (0)