12 ёшли Хесус Мамани Рамос исмли бола бир кунга Перунинг ривожланиш ва ижтимоий интеграция вазири бўлди. Бу ҳақда «РИА Новости» хабар берди.
Перу айни пайтда «Биргаликда Перу» ижтимоий дастурини амалга оширмоқда. Дастурнинг мақсади таълим, соғлиқни сақлаш соҳаларида аҳолининг ночор қатламига турли хизмат ва имкониятлар тақдим этишдан иборат. 2017 йилда Перуда камбағаллар сони 375 минг кишига кўпайган ва 6,9 миллион кишига етган. Перунинг аҳолиси сони 2017 йилда 32,17 миллион кишини ташкил этган бўлиб, мамлакатдаги ночорлик даражаси 18 фоизни ташкил қилади.
Дастур доирасида ночор оилаларнинг болалари Рождество тилакларини ёзган. Перунинг жануби-шарқидаги Пуно шаҳрида яшовчи Хесус Рамос ўз тилагида қийин вазиятга тушиб қоилган болаларга ёрдам бериш истагини ёзган. Перунинг ривожланиш ва ижтимоий интеграция вазири Лилиана Ла Роса болани пойтахтга ишга таклиф қилган.
Қасамёд қабул қилиш маросимида боланинг онаси, шунингдек, дастурда иштирок этувчи болалар қатнашган.
Вазирнинг маълум қилишича, Хесуснинг кун тартиби жуда тиғиз, у вазирлик раҳбарияти билан йиғилишда иштирок этади.
Изоҳ (0)