Бухоро шаҳрида Мудофаа вазирлиги қўшинлари ҳарбий хизматчилари учун 90 оилага мўлжалланган беш қаватли учта уй фойдаланишга топширилди, деб ёзади ЎзА.
Шу муносабат билан байрамона тарзда ташкил этилган тадбирда ҳарбий хизматчилар, уларнинг оила аъзолари, яқинлари, вилоят ва шаҳар жамоатчилиги вакиллари иштирок этди.
Тадбирда Бухоро вилояти ҳокими Ўктам Барноев, Жануби-ғарбий махсус ҳарбий округи қўшинлари қўмондони полковник Зайнобиддин Иминов сўзга чиқиб, янги турар-жой биноларига кўчиб ўтаётган барчани қутлади.
— Замонавий лойиҳалар асосида қурилган уйлар шинам. Уларда барча қулайликлар яратилган. Яна энг муҳим жиҳати, уйлар қийматининг 25 фоизи давлат томонидан бошланғич бадал сифатида тўлаб берилган. Қолаверса, мазкур квартира бизга узоқ муддатга, йиллик 7 фоизли ипотека кредити асосида берилгани биз учун катта ғамхўрликдир. Тўғрисини айтганда бу қувончли воқеани кўпдан бери кутгандик. Олис гарнизонларда, ижарага олинган квартирадан квартирага кўчавериш, рости оилани қийнаб қўяр экан. Болаларим ҳам бу орада қанча мактабларни алмаштирди. Энди ҳаётимиз бошқача, янада файзли ва баракали бўлади, — дейди, подполковник Шерали Раҳмонов.
Янги уйлар умумтаълим мактаби ва мактабгача таълим муассасаси қурилган ҳудудда жойлашган. Бу ҳарбий хизматчиларнинг фарзандлари транспорт воситаларидан фойдаланмасдан мактаб ва боғчага бемалол пиёда қатнашларига имкон беради. Бунинг устига уйларнинг олд тарафига қурилган болалар майдончаси бўш вақтнинг мазмунли ўтишини таъминлайди.
Изоҳ (0)