Қорақалпоғистон Республикаси Тахиатош тумани «Сарайкул» овулида яшовчи Тачмират Ҳожаметов 1990 йилда оила қурган эди. Орадан 28 йил ўтиб ўз уйига эгалик қилиш ҳуқуқни қўлга киритди, деб ёзади ЎзА.
Тахиатош давлат хизматлари маркази биносида туман ҳокимининг мулк ҳуқуқини эътироф этиш тўғрисидаги қарорини қўлига олар экан, Тачмират Ҳожаметов 28 йиллик муаммонинг бундай осонгина, бир жойнинг ўзидан қисқа вақт мобайнида ҳал бўлганига ишонгиси келмасди.
– Ахир ўтган йилларда яшаётган ханодонимни номимга ҳужжатлаштириш учун идорама-идора юриб, барча сай’ ҳаракатларим беҳуда кетган эди-да, – дейди Тачмират. –Президентимизга раҳмат, масала осонгина ҳал бўлди. Давлат хизмати маркази қисқа муддат ичида уйга эгалик ҳуқуқимни тасдиқловчи ҳужжатни қўлимга тутқазди. Бу менга ва оиламга янги йил арафасида унутилмас ва энг бебаҳо совға бўлди.
– Президентимизнинг 2018 йил 20 апрелдаги "Фуқароларни ижтимоий қўллаб-қувватлаш бўйича қўшимча чора-тадбирлар ҳамда ўзбошимчалик билан қурилган турар жойларга нисбатан мулк ҳуқуқини эътироф этиш бўйича бир марталик умумдавлат акциясини ўтказиш тўғрисида»ги фармони кўплаб фуқароларнинг йиллар давомида ечилмай келган муаммоларини ҳал қилишда муҳим аҳамият касб этаётир, – дейди Тахиатош тумани Давлат хизматлари маркази бўлим бошлиғи А.Оразимбетов. – Акция бошланиши арафасида Ер тузиш ва кўчмас мулк кадастри ДК Тахиатош филиалидан олинган маълумотига кўра туманда 1 минг 702 та мулк ҳуқуқи эътироф этилмаган, ўзбошимчалик билан қурилган турар жойлар аниқланган.
Тахиатош тумани Давлат хизматлари марказига кўчмас мулкка нисбатан мулк ҳуқуқини олиш бўйича 1 минг 256 та фуқародан мурожаатлар келиб тушган. Бу кадастр хизматининг юқоридаги маълумотига асосланадиган бўлсак, ўзбошимчалик билан қурилган турар жойлар эгаларининг 75 фоизидан аризалар қабул қилинганлигини англатади.
Мурожаатлар туман комиссияси томонидан ўрганилган. 690 фуқарога туман ҳокимининг мулк ҳуқуқини эътироф этиш тўғрисидаги қарори берилган. 241 та мурожаат эса туман комиссияси томонидан ўрганилаётир. Мазкур акция 2019 йилнинг 1 май кунига қадар давом этади. Акция якунлангач ўзбошимчалик билан қурилган уйларга нисбатан мулк ҳуқуқини бериш нормалари бекор қилинади.
Изоҳ (0)