Ягона солиқ тўловини тўловчилар рўйхати ўзгарди

Ягона солиқ тўлови маҳсулот тақсимотига оид битимларнинг иштирокчилари бўлган юридик шахсларга нисбатан татбиқ этилмайди. Бу ҳақда Spot хабар берди.

Ягона солиқ тўловини тўловчилар рўйхатига ўзгартиришлар киритилди. Бу ҳақда «Солиқ ва бюджет сиёсатининг 2019 йилга мўлжалланган асосий йўналишлари қабул қилинганлиги муносабати билан Ўзбекистон Республикасининг айрим қонун ҳужжатларига ўзгартиш ва қўшимчалар киритиш тўғрисида»ги қонунда келтирилган.

Ягона солиқ тўловини тўловчиларга солиқ даврида олинган ялпи тушуми бир миллиард сўмдан ошмаган юридик шахслар, оддий ширкат ишларини юритиш зиммасига юклатилган (ишончли шахс) шерик (иштирокчи) — солиқ даврида оддий ширкат фаолиятидан олинган ялпи тушуми бир миллиард сўмдан ошмаган якка тартибдаги тадбиркор, солиқ даврида товарларни (ишларни, хизматларни) сотишдан олинган тушуми белгиланган миқдордан ошган, лекин бир миллиард сўмгача бўлган якка тартибдаги тадбиркорлар киради.

Шунингдек ушбу рўйхатга солиқ даврида товарларни (ишларни, хизматларни) реализация қилишдан олинган тушуми бир миллиард сўмдан ошмаган мева-сабзавот маҳсулотлари экспортини амалга оширувчи, электрон тижорат субъектларининг миллий реестрига киритилган якка тартибдаги тадбиркорлар киради.

Солиқ даврида олинган ялпи тушуми бир миллиард сўмдан ошмаган оилавий корхоналар, солиқ даврида тадбиркорлик фаолиятидан олинган даромадлари бир миллиард сўмдан ошмаслиги шарти билан нотижорат ташкилотлар ҳам Ягона солиқ тўловини тўловчилар саналади.

Воситачилик, топшириқ шартномаси бўйича ҳамда воситачилик хизматлари кўрсатишга оид бошқа шартномалар бўйича воситачилик хизматлари кўрсатувчи юридик шахслар йиллик айланманинг (тушумнинг) белгиланган чегаравий миқдорини товар айланмасидан (битим суммаларидан) келиб чиққан ҳолда ҳисоблаб чиқаради.

Ягона солиқ тўлови акциз солиғи тўланадиган маҳсулот ишлаб чиқаришни ва ер қаъридан фойдаланганлик учун солиқ солинадиган фойдали қазилмаларни кавлаб олишни амалга оширувчи, акциз солиғига тортиладиган мобил алоқа хизматлари кўрсатувчи, маҳсулот тақсимотига оид битимларнинг иштирокчилари бўлган юридик шахсларга нисбатан татбиқ этилмайди.