Cobalt’ли бўлган Шавкат, Миромон ва Мирзиё, Белдирсойда ҳалок бўлган сноубордчилар, ИИВнинг янги байроғи ва эмблемаси ҳамда куннинг бошқа муҳим хабарлари

25 декабрнинг асосий янгиликлари — «Дарё» дайжестида.

Тошкент шаҳрида туғилган уч эгизак Шавкат, Миромон ва Мирзиёнинг ота-онасига Президент совғаси – Cobalt автомашинаси совға қилинди.

Шунингдек, оилага Президент совғаси сифатида коляска ва турли совға-саломлар етказилди.

Аввалроқ, 18 декабрда Тошкентда Руслан Қорёғдиев ва Моҳигул Шойиқуловалар оиласида уч эгизак ўғил фарзанд дунёга келгани ҳақида хабар берилган эди.

***

Тошкент вилоятининг Бўстонлиқ туманида, Белдирсой ҳудудида 24 декабрь, душанба куни 3 нафар сноубордчи ҳалок бўлди. Уларнинг уччови ҳам Тошкентдан, маҳалладош бўлган.

24 декабрь куни Тошкент вилояти ФВБ тезкор навбатчисидан олинган маълумотига кўра, соат 16:00 ларда Бўстонлиқ тумани «Белдирсой» МФЙ ҳудудида жойлашган «Белдирсой» спорт мажмуасининг «Дор йўлаги» (канат йўли) ҳудудида 3 нафар фуқаро (М.М. 1994 йилда туғилган, М.М. 1999 йилда туғилган, М.С. 1999 йилда туғилган) сноуборд спорт тури билан шуғулланиш жараёнида, тақиқланган хавфли ҳудудда ҳаракатланишлари натижасида қор кўчкиси юзага келган, оқибатда улар қор уюмлари остида қолиб вафот этган.

***

Ўзбекистонда Президент фармони билан Ички ишлар вазирлигининг байроғи ва эмблемаси намуналари тасдиқланди.

Байроқ ва эмблемани тайёрлаш, фойдаланиш ва сақлаш тартиби Ички ишлар вазири томонидан тасдиқланади.

Бундан кўзда тутилган мақсад ички ишлар органлари бирдамлиги, ходимларни Ватанга садоқат руҳида тарбиялаш, улар томонидан «Халқ манфаатларига хизмат қилиш» хизмат бурчи сўзсиз бажарилишини таъминлашдан иборат эканлиги қайд этилган.

***

Тошкент марказида «Сталин осмонўпарлари» услубидаги 27 қаватли турар жой биноси қурилади.

Бинонинг олд томони шарқона нақшлар ва табиий тошлар элементлари билан безатилади. Ички безакларда табиий тош ва массивдан фойдаланиш режалаштирилмоқда. «М-Tower» деб номланган 136 метрлик минора 2020 йилгача Яккасарой туманида қурилади. Бинонинг майдони 22 минг квадрат метрдан зиёдни ташкил этади.

Биринчи қават хусусий ва жамоат жойларига ажратилади, иккинчи ва учинчи қаватлар тўлиқ савдо майдонига бағишланади: офислар, дўконлар, фитнесс маркази ва спа-салон.

Тўртинчи қаватдан 27-қаватгача турар жойлар жойлашади. Мажмуа таркибида шунингдек, гараж биноси, унинг томида ресторан, қиш боғи мавжуд бўлади.

«Сталин осмонўпарлари» 1947—1957 йиллар мобайнида Москвада қурилган еттита баланд бинолардир.

***

Ўзбекистонда археологлар Буюк Хитой деворига ўхшаш деворни топди.

Россия Фанлар академияси Археология институти ходимлари Ўзбекистон Фанлар академияси Санъатшунослик институти ҳамкабслари билан биргаликда эрамиздан аввалги III асрга мансуб қадимги Бақтриянинг шимолий чегараларида кўчманчилар ҳужумидан ҳимояланиш учун чегараларни тўсиб турувчи ягона мудофаа иншоотлари тизими бўлганлигини аниқлади.

Россия ва ўзбекистонлик мутахассислар Узундара қалъасини ўрганиш жараёнида у улкан мудофаа тизимининг бир қисми бўлганлигини исботлади. 2018 йилги қазишма ишлари натижасида олимлар қалъанинг ички қўрғонини тўлиқ очди ва унинг батафсил архитектура режасини тузди. Улар қалъанинг қурилиши, ҳаёти ҳақида гувоҳлик қилувчи бой археологик материаллар топган. Шунингдек, ҳужум оқибатида қалъанинг қулаганлигидан дарак берувчи материаллар олган.