2018 йилнинг 20 декабрь куни Тошкент шаҳридаги Инҳа университетида «Саноат Қурилиш Банк»нинг молиявий технология маркази» («Financial Technology center of Sanoat Qurilish Bank») нинг очилиш маросими бўлиб ўтди. Бу ҳақда Тошкент шаҳридаги Инҳа университети матбуот хизмати хабар берди.
Тошкент шаҳридаги Инҳа университети ректори в.б. Музаффар Жалолов ҳамда «Саноат Қурилиш Банк» АТБ бошқаруви раиси Азиз Воитов меҳмонларни қутлашди.
Ушбу марказ, университет талабаларига турли ахборот-коммуникация технологиялари (АКТ) ёрдамида банк бизнесининг барча йўналишлари бўйича назарий билимларини амалиётда синаб кўришга ва бу борадаги кўникмаларини мустаҳкамлашга қулай шароит яратади.
Маълумки, «Саноат Қурилиш Банк» билан Тошкент шаҳридаги Инҳа университети ўртасида ўзаро ҳамкорлик меморандуми имзоланган эди. Мазкур келишувга кўра, университет биносида банк хизматлари ва амалиётларини автоматлаштириш бўйича «Саноат Қурилиш Банк»нинг молиявий технология маркази» («Financial Technology center of Sanoat Qurilish Bank») ташкил этилди.
Бу тадбир асосида банк ва SAP компанияси вакиллари Марказда дастурий таъминотлар яратиш, уларни банк АКТ тизимига жорий қилиш, шу соҳада янги банк хизматлари учун бизнес жараёнларни ташкил этиш ва таҳлилий ҳисоботларни яратиш, шунингдек дастурий таъминотларга техник хизмат кўрсатиш билан талаба ёшларнинг бизнес борасидаги билим ва тажрибаларини кенгайишига имкон яратади.
Ушбу ҳамкорлик доирасида талабаларнинг замонавий билим ва маҳоратларини оширишга катта эътибор қаратилмоқда. Шу мақсадда 2018 – 2019-ўқув йилида олийгоҳнинг 3–4-босқич талабалари орасидан билим жиҳатдан юқори рейтингга эга 12 нафар талаба танлаб олинди. Келажакда уларнинг банк билан бевосита алоқаларни мустаҳкамлашга шароитлар ҳозирланмоқда.
Изоҳ (0)