Ёшларнинг стартап-ташаббусларини қўллаб-қувватлаш дастурининг учинчи даври Demo Day махсус тадбири билан якунланди, Бу ҳақда тадбир ташкилотчилари «Дарё»га хабар берди.
Ушбу дастурда 18 та жамоа ўз лойиҳаларини тақдим қилди. Demo Day якуни бўйича энг яхши деб топилган бешта лойиҳа ўз ғояларини ривожлантириш учун беминнат инвестиция шаклидаги пул мукофотларига эга бўлди.
Хусусан, ариза юборган 510 жамоадан 92 таси дастурда иштирок этиш учун саралаб олинди. 18 та жамоа якуний учинчи даврга муваффақиятли ўтиб, ўз стартап-лойиҳаларини Demo Day тадбиридаги истиқболдаги сармоячилар ва манфаатдор ташкилотларга тақдим қилиш имкониятини қўлга киритди.
Жорий йилда таълим соҳасига оид лойиҳалар, виртуал реалликка асосланган савдо майдончалари, стартаплар ва бошқа лойиҳалар учун краудфандинг платформалари, бионик протезни ишлаб чиқариш бўйича хизматлар, савдо ва умумий овқатланишни бошқаришнинг автоматлашган тизимлари ҳамда тиббиёт, реклама, туризм соҳасидаги бошқа лойиҳалар тақдим этди.
Бу йил қуйидаги бешта жамоалар ғолиб нишонини эгаллади.
1. Little Big Media - бу рақамли рекламани жойлаштириш учун супермаркетларда самарали майдончани тақдим этишга доир хизмат. Майдон экран (7-8 дюйм) ўрнатилган гаджетдан ҳамда супермаркет харидорларининг смартфонларини қувватлантириш имконидан иборат. Гаджет харидор аравачасининг тутқичига маҳкамланади.
2. Scratch’да дастурлашиш» Фарғона шаҳридаги лойиҳа болаларни дастурий кўникмаларини ва алгоритмик фикрлашни ривожлантириш, компьютер дастурларига қизиқиш уйғотиш ва IT ижодкорлигини ривожлантиришга қаратилган.
3. «Бионик қўлни ишлаб чиқариш» - бу бионик протезни ишлаб чиқариш ва сотишга оид хизмат. Бионик протез, бу – йўқотилган органнинг ишини тузилмавий ва функсионал жиҳатдан қайтарувчи сунъий орган.
4. Unibus инновацион технология бўлиб, ичидаги микроназоратчилар ёки микропроцессорлар, шунингдек нейрон тармоқлар орқали ишлайдиган ақлли камераси ёрдамида йўловчилар оқимини ҳисоблаш, кун давомида жамоат транспортида қўлланиладиган малумотлар статистикасини юритиш имконини беради.
5. Startupmarket.uz - краудфандинг учун стартаплар каталоги.
Demo Day тадбирида намойиш этилган стартап-лойиҳалар «Стартап-ташаббуслар» Дастури иштирокчиларининг узоқ давом этган меҳнати самарасидир. Дастур давомида жамоаларнинг етакчилари ва аъзолари трекерлар (шахсий мураббийлар) раҳбарлиги остида ўз назарияларини синовдан ўтказиб, минимал иш моделларини яратди ва уларни амалиётда текшириб кўрдилар, мақсадли аудиторияни ўрганиб, қайта жавобларга эга бўлди, дастлабки «қўл» савдосини синаб кўрдилар, лойиҳанинг камчиликларини таҳлил қилиб, уни такомиллаштирди.
Дастурни амалга ошириш давомида жамоалар «тежамкор стартап» (Lean Startup) методологиясини тушунтириш, ғояни ривожлантириш ва муваффақиятли бизнесга айлантириш асосларини ўрганишга қаратилган беш кунлик амалий семинарда иштирок этди.
Бунга қўшимча равишда малакали экспертлар иштирокидаги маҳорат мактаблари, жумладан Ўзбекистон ва Россиянинг етакчи экспертлари иштирокида тақдимотларни тайёрлаш бўйича тренинг ўтказилди.
Изоҳ (0)