21 декабрнинг асосий янгиликлари — «Дарё» дайжестида.
Ўзбекистон Президенти Шавкат Мирзиёев Осиё журналистлари ассоциацияси (ОЖА) томонидан Осиёда йил одами деб тан олинди.
ОЖАнинг қайд этишича, ғолиблар номи минтақанинг ҳар бир давлати вакиллари ва ассоциация аъзолари тавсиялари ҳамда баҳоларидан сўнг махсус ҳакамлар томонидан аниқланди.
Ўзбекистон раҳбари «сиёсат» йўналиши бўйича ғолиб, деб эътироф этилди.
Ушбу ғалаба қўшни давлатлар билан фаол ҳамкорлик алоқаларини ўрнатганлик, Марказий Осиёда тинчлик-тотувликни асрашга катта ҳисса қўшганлик учун берилди.
***
Украина президенти Пётр Порошенкодан Россияга уруш эълон қилиш ва у билан барча дипломатик алоқаларни узиш сўралган мурожаат лойиҳаси Украина парламентига кўриб чиқиш учун киритилди.
Унинг муаллифи — фракциядан ташқари депутат Виталий Куприйдир.
Аввалроқ Украинада 2019 йил 1 апрелдан Россия билан дўстлик ва ҳамкорлик ҳақидаги шартномани тугатиш ҳақидаги қонун қабул қилинган эди.
***
Жаҳонгир Ортиқхўжаев Тошкент шаҳар ҳокими этиб тайинланди.
Халқ депутатлари Тошкент шаҳар сессиясида ташкилий масала кўрилди. Президент Шавкат Мирзиёев Тошкент шаҳар ҳокими вазифасини вақтинча бажариб келаётган Жаҳонгир Ортиқхўжаев номзодини шаҳар ҳокими лавозимига тавсия этди.
Халқ депутатлари Жаҳонгир Ортиқхўжаев номзодини қўллаб-қувватлади. Сўзга чиққанлар янги ҳоким ва унинг барча ўринбосарлари, барча фаоллар бир мушт бўлиб, пойтахти жадал ривожлантириш бўйича бугун белгилаб берилган вазифаларни бажариш йўлида бор куч ва имкониятларини сафарбар этишини таъкидлади.
***
Собиқ давлат маслаҳатчиси Муиджон Тоҳирий ҳибсга олинган.
Муиджон Тоҳирий 2006-2008 йилларда Ўзбекистон Миллий хавфсизлик хизмати раиси ўринбосари, 2008-2010 йилларда Ўзбекистон Миллий хавфсизлик кенгаши котиби ўринбосари лавозимларида ишлаган.
2010 йил сентябрдан 2011 йил июнгача Ўзбекистон Президентининг давлат маслаҳатчиси бўлган.
2011 йил июнь ойидан яна МХХ раиси ўринбосари лавозимига қайтган ва 2016 йил охиригача ишлаган.
***
Тошкентдаги тунги клубда 19 ёшли қиз икки йигитни пичоқлади.
Жиноят ишлари бўйича Олмазор туман судининг судьяси Мирзиёд Абидов жорий йилнинг 6 октябрь куни тахминан соат эрталабки 04:40 да Яккасарой тумани Фаробий кўчасида жойлашган «Ниҳол» тунги клуби яқинида икки йигитга пичоқ билан зарба берган қизга ҳукм ўқиди.
Судланувчининг сўзларига кўра, жанжал эркакларнинг бири унинг онасининг оёғига тепганидан кейин содир бўлган. Н.Ш. жавобан Абдулла Юнусовнинг кўкрак қисмига пичоқ билан зарба берган. Бундан ташқари, уларни ажратмоқчи бўлган Сирожиддин Зуфаровни ҳам пичоқ билан жароҳатлаган.
Н.Ш. қўлга олинган бўлиб, мазкур ҳолат юзасидан жиноят иши қўзғатилган.
Изоҳ (0)