«Тараққиёт стратегияси» марказида 20 декабрь куни журналистлар учун «Сарҳисоб: Адлия вазирлиги томонидан 2018 йилги Давлат дастури ижроси» мавзусида ташкил этилган матбуот анжуманида айнан адлия органларининг амалга оширилаётган ислоҳотлардаги ўрни ҳақида гап борди, деб хабар берди Адлия вазирлиги Жамоатчилик билан алоқалар бўлими.
Тадбирда айтилишича адлия тизимида Республика – вилоят – туман (шаҳар) уч поғонали принцип бўйича вертикал бошқарув жорий этилди.
Адлия вазирлиги ҳуқуқни муҳофаза қилувчи орган деб белгиланди, вазирик ваколатлари кенгайтирилди бу эса ўз навбатида мамлакатда қонун устуворлигини таъминлашдаги муҳим қадамлардан бири бўлди.
Адлия вазирлиги марказий аппарати тузилмасида бир қатор янги бошқармалар ташкил этилди. Жорий йилдан бошлаб, Адлия вазири давлат органлари ва ташкилотларининг норма ижодкорлиги фаолияти ва ҳуқуқни қўллаш амалиёти тўғрисида ҳар йили Олий Мажлис Сенатига ахборот тақдим этадиган бўлди. 2018 йил 1 майдан бошлаб эса норматив-ҳуқуқий ҳужжатларнинг лойиҳалари Вазирлар Маҳкамасига, Ўзбекистон Президенти Администрациясига фақат Адлия вазирлигининг ҳуқуқий экспертиза якуни бўйича уларни қабул қилишнинг мақсадга мувофиқлиги ҳақидаги хулосаси мавжуд бўлгандагина киритилмоқда.
Давлат бошқаруви тизими самарадорлигини таҳлил қилиш, Ижтимоий-иқтисодий соҳада ҳуқуқни қўллаш амалиётини ўрганиш бошқармалари, Ҳуқуқий сиёсат тадқиқот институти, Қорақалпоғистон Республикаси, вилоятлар ва Тошкент шаҳрида юридик коллежлар ҳамда энг муҳими туман (шаҳар) адлия бўлимлари ташкил этилди;
Адлия вазирлиги халқаро арбитражлар ва суд ишлари масалалари бўйича Ўзбекистон Республикасининг манфаатларини ҳимоя қилиш соҳасида ваколатли давлат бошқаруви органи этиб белгиланди;
Туман (шаҳар) адлия бўлимлари томонидан шу кунгача 25 мингдан ортиқ мурожаат қабул қилиниб, қонуний ҳал этилди.
12 мингга яқин фуқароларнинг қабули амалга оширилиб, 7 мингдан ортиқ фуқаролар сайёр тартибда уйма-уй юриб қабул қилинди.
Адлия вазирлиги томонидан 221 та норматив-ҳуқуқий ҳужжат, шу жумладан 44 та қонун лойиҳалари ишлаб чиқилди. Ушбу кўрсаткич охирги уч йил давомида 3 баробарга ошди.
1 561 та қонун ҳужжати лойиҳалари ҳуқуқий экспертизадан ўтказилди, 516 та идоравий норматив-ҳуқуқий ҳужжатлар давлат рўйхатига олинди.
Аниқланган 407 мингдан ортиқ қонун бузилиши ҳолатларини бартараф этиш бўйича вазирлик ва идораларга 7 мингдан ортиқ тақдимнома ва 19 мингдан ортиқ огоҳнома киритилди, 1 800 дан ортиқ ноқонуний қарорлар бекор қилинди, 2000 нафарга яқин шахсларнинг маъмурий жавобгарликка тортилиши таъминланди, 5 мингга яқин шахслар интизомий жавобгарликка тортилиб, 400 га яқини нафари эгаллаб турган лавозимидан озод этилди.
Судларга 32 миллиард сўмлик 8 мингдан ортиқ даъво аризалари киритилди.
Келиб тушган жами 37 мингдан ортиқ мурожаатларнинг қарийб 27 мингтаси қонуний ҳал этилди.
Мурожаатларни жойига чиқиб ўрганиш, ўтган йилнинг шу даврига нисбатан 2 баробарга кўпайди.
800 га яқин юридик хизматлар ходимлари аттестациядан ўтказилди, ўтган йилнинг мос даврига нисбатан малакаси оширилган юридик хизмат ходимларининг сони 910 тага кўпайиб, 1 191 тани ташкил этмоқда.
2 500 га яқин номзод лавозимига тайинланиш учун адлия органларида келишилди.
Аҳолининг ҳуқуқий онгини ошириш бўйича 150 мингдан ортиқ тарғибот тадбирлари ўтказилди.
Ушбу тадбирларнинг 71 926 таси бевосита қишлоқ жойларда, туманнинг энг чекка ҳудудларида адлия бўлимлари томонидан амалга оширилди.
Изоҳ (0)