18 декабрь куни Қашқадарё вилоят ҳокимлиги томонидан Шавкат Мирзиёев билан 13–14 декабрь кунлари Қашқадарёга ташрифи чоғида учрашган 21 ёшли Шоҳсанам Тошпўлатовага 2 хонали уй калити топширилди. Шоҳсанам Тошпўлатова сузиш бўйича кўп карра Ўзбекистон чемпиони, III Параосиё ўйинларида ғолиб бўлган. Бу ҳақда вилоят ҳокимлиги матбуот хизмати раҳбари Бекзод Маматқуловга таяниб, Turon24 хабар берди.
Шоҳсанам Тошпўлатова мамлакат миқёсидаги мусобақалар ва Параосиё ўйинларидан ташқари «Рио–2016» паралимпия ўйинларида совриндор бўлган. 2017 йили эса Ўзбекистонда бўлиб ўтган сув спорти бўйича 9-Осиё ўйинларида ғолиб бўлган. Спорт соҳасида эришган ютуқлари учун «Жасорат» медали билан тақдирланган.
«Жорий йилнинг 6–13 октябрь кунлари Индонезиянинг Жакарта шаҳрида бўлиб ўтган III Параосиё ўйинларида вакилларимиз иштироки сермаҳсул бўлди, – дейди вилоят жисмоний тарбия ва спорт бошқармаси матбуот хизмати ходими Нурбек Сайнабиев. – Сузиш беллашувларида спортчиларимиз 10 та олтин, 6 та кумуш, 3 та бронза медалларини қўлга киритишди, бир неча бор рекордларни қайд этишди».
Нурбек Сайнабиевнинг айтишича, III Параосиё ўйинларида қатнашган Қашқадарё вилояти терма жамоаси Ўзбекистоннинг бошқа ҳудудлари спортчилари ичида энг кўп медаль жамғаришга эришган.
«Спортчи қизимизнинг ушбу ютуқлари мамлакатимиз раҳбари томонидан илиқ қарши олинди ҳамда унга вилоят марказидан икки хонали уй совға қилинди, – дейди вилоят матбуот хизмати раҳбари Бекзод Маматқулов. – Шоҳсанам 2020 йилда Япония (Токио)да бўлиб ўтадиган XVI ёзги Паралимпия ўйинларида ҳам қатнашади. Мазкур мусобақада ҳам у мамлакатимиз шарафини муносиб ҳимоя қилишига ишонамиз».
Изоҳ (0)