Ёшларга оид давлат сиёсатини тарғиб қилувчи ролик муаллифларини рағбатлантириш мақсадида ижтимоий роликлар танлови эълон қилинди. Бу ҳақда «Дарё»га Ёшлар медиа маркази маълум қилди.
Ўзбекистон ёшлар иттифоқи ҳамда Ёшлар медиа маркази томонидан ўтказилаётган танлов инновацион ғоя ва ақлий салоҳиятни ошириш, ёшлар тадбиркорлигини ривожлантириш ва бандликка кўмаклашиш, соғлом турмуш тарзи ва оммавий спортни тарғиб қилиш, жиноятчилик, гиёҳвандлик ва бошқа салбий иллатларга қарши курашиш ҳамда «Бу — менинг Ўзбекистоним» каби 5 та номинация бўйича ўтказилади.
Ҳар бир йўналиш бўйича 1—3-ўрин ҳамда рағбатлантирувчи мукофотлар берилади. 1-ўринга 5 миллион, 2-ўринга 3 миллион, 3-ўринга 2 миллион сўм, рағбатлантирувчи ўрин соҳибига эса 1 миллион сўм ажратилган.
Ҳакамлар ҳайъати қарори билан 5 та номинацияга тақдим этилган роликлардан бири мутлоқ ғолиб сифатида эълон қилинади ва муаллифга 10 миллион сўм берилади.
Материаллар жорий йил 24 декабрга қадар Ёшлар ижод саройида қабул қилинади. Унда 2018 йил давомида тасвирга олинган мавзуга оид роликлар тақдим қилиниши мумкин.
Изоҳ (0)