Москвада 6 нафар меҳнат муҳожири газдан заҳарланди. Улардан 3 нафари ўзбекистонлик

Россиянинг Москва вилояти Домодедово туманида беш киши маиший газдан заҳарланиш оқибатида вафот этди, деб хабар беради «MK.ru».

Шифокорлар яна бир жабрланувчининг ҳаётини сақлаб қолишга уринмоқда.

Фожиа тумандаги Шестово қишлоғида юз берди. Меҳнат муҳожирлари бу ерда меҳмонхона қураётган эди.

Жабрланувчиларнинг уч нафари ўзбекистонлик, уч нафари эса арманистонлик эканлиги айтилмоқда. Уларни шериклари 16 декабрь куни ҳушсиз ҳолда топган.

Қурувчилар тез тиббий ёрдамга мурожаат қилган. Шифокорлар беш кишининг вафот этганини маълум қилган.

Яна бир жабрланувчини эса Видное шаҳридаги касалхонага олиб кетишган.

Дастлабки тахминларга кўра, фожиа маиший газдан заҳарланиш оқибатида юз берган.

Меҳнат муҳожирларининг яшаш жойидан улар исиниш учун фойдаланган газ баллони топилган.

Бундан ташқари, тунда мигрантлар спиртли ичимлик ичган. Улар ухлаб қолгани сабабли газ баллонининг ўчиб қолганини сезмаган.

Ҳолат юзасидан суриштирув ишлари олиб борилмоқда.