Сирдарё вилоятининг Сардоба тумани давлат солиқ идораси бўлим бошлиғи Аҳмаджон Йўлдошев (исм-фамилиялар ўзгартирилган) тумандаги «Сувли сой жилғаси» фермер хўжалигининг солиқ ва мажбурий тўловлардан бўлган 4 миллион 150 минг сўм қарздорлигини аниқлаб, бундан ўз манфаати йўлида фойдаланишни режалаштирди. Бу ҳақда ЎзА хабар бермоқда.
У хўжалик раҳбари Ҳайитқул Дадабоевни ҳузурига чақириб, солиқ ва мажбурий тўловлардан анча-мунча қарзи борлигини, иш судга ошиб, мажбурий ижро орқали номидаги бор мол-мулк, моддий қимматликлар мусодара бўлиши мумкинлигини айтади.
Бу гаплардан боши қотган Ҳайитқулнинг жонига Аҳмаджон оро киради. Фермерга ўлимдан бошқа ҳамма нарсанинг иложи борлигини, арзимаган 3 миллион сўм эвазига хўжаликни банкрот деб эълон қилдиришини, шу орқали солиқ ва бошқа барча қарздорликларни сўндириш мумкинлигини айтади. Фермер халоскор бўлиб кўринган Аҳмаджоннинг «беғараз ёрдам»ига рози бўлади.
Ҳайитқул Дадабоев жорий йил 14—18 январь кунлари деярли ҳар куни Аҳмаджоннинг ёнига келиб, тез орада ваъда қилинган пулни олиб келиб беришини, турли сабабларга кўра ҳозирча имкони бўлмаётганини билдиради.
«Ҳайитқул Дадабоев олдимга келганида, ваъда қилган пулдан зарурат туфайли озроғини ишлатиб қўйганини, шу сабабли ҳозирча 2,5 миллион сўм беришга имкони борлигини айтди. Ҳар гал келганида моддий томондан қийналгани ҳақида гапирар эди, шу боис унинг бу таклифига рози бўлдим», деб судда ўз айбига иқрор бўлди Аҳмаджон Йўлдошев.
Аҳмаджон Йўлдошев Сардоба туман давлат солиқ инспекциясидаги хизмат хонасида кимёвий ишлов берилган 2,5 миллион сўм олган вақтида тезкор ходимлар томонидан ашёвий далил билан жиноят устида қўлга олинди.
Суд ҳайъати судланувчи Аҳмаджон Йўлдошевга нисбатан жазо тайинлашда унинг ўз қилмишидан пушаймонлиги, 3 нафар вояга етмаган фарзанди борлиги, муқаддам судланмаганини жазони енгиллаштирувчи ҳолатлар, деб баҳолади ва унга нисбатан жазони оғирлаштирувчи ҳолатлар мавжуд эмаслиги ҳам инобатга олинди.
Содир этилган жиноятнинг ижтимоий хавфлилик даражасини инобатга олиб, уни жамиятдан ажратмаган ҳолда ахлоқан тузатиш имкони бор, деган қатъий хулосага келинди. А.Йўлдошевга нисбатан озодликни чеклаш жазоси тайинланди.
А.Йўлдошев мазкур жиноятни ўзи эгаллаб турган лавозими билан боғлиқ ҳолда содир этгани эътиборга олиниб, келажакда яна шундай жиноятлар содир этишининг олдини олиш мақсадида суд ҳайъати унга нисбатан моддий жавобгарлик ва мансабдорлик лавозимларида ишлаш ҳуқуқидан маҳрум қилиш жазоси тайинлади.
Суд ҳайъати жабрланувчига етказилган зарар тўлиқ қопланганини инобатга олиб, А.Йўлдошевга нисбатан қўлланилган «қамоққа олиш» тарзидаги эҳтиёт чорасини бекор қилди ва уни суд залидан озод этишни лозим топди.
Изоҳ (0)