Андижон вилоятининг Булоқбоши туманида цемент ишлаб чиқарувчи «Shenfen-bridge of friendship» МЧЖ шаклидаги Ўзбекистон-Хитой қўшма корхонаси қурилишининг бошланишига бағишланган тантана бўлиб ўтди. Бу ҳақда Андижон вилояти ҳокимлиги матбуот хизмати «Дарё»га хабар бермоқда.
Унда сўз олган вилоят ҳокими, Олий Мажлис Сенати аъзоси Шуҳратбек Абдураҳмонов дастлаб Булоқбошида саноат маҳсулотлари ишлаб чиқариш суръатининг пастлиги, амалдаги йилнинг ўтган даврида булоқбошиликларнинг вилоятдаги улуши атиги 1,4 фоизни ташкил этганлигига йиғилганлар эътиборини қаратди. Чилустун тоғлари ёнбағрида барпо этиладиган янги корхона бу борада катта ўзгаришларга сабаб бўлишини таъкидлади.
Давлат раҳбарининг ўтган йили Андижонга ташрифи чоғида тақдимот қилинган мазкур лойиҳанинг умумий қиймати 203,9 миллион АҚШ долларини ташкил этади. Қурилиш ишлари 18 ойда якунланиши кўзда тутилмоқда. Муҳими, бу билан 750 та иш ўрни яратилади. Корхона ишга тушгач туманда саноат маҳсулотлари ишлаб чиқариш ҳажми 5 маротабага ортади. Йилига қўшимча 20 миллион АҚШ доллари миқдорида экспортни амалга ошириш имконияти яратилади.
Шу ўринда қайд этиш лозимки, ҳамкор «Zhejiang Shangfeng Building Materials Co. Ltd» компанияси Хитойдаги 50 та энг кучли компаниялардан бири сифатида тан олинган бўлиб, 40 йиллик тажрибага эга. Энергия тежамкор ва экологик тоза маҳсулотлари билан танилган. Бош мақсад — Ўзбекистонда номига муносиб дўстлик кўпригини яратиш. Лойиҳа асосан маҳаллий ёшлар билан амалга оширилади. Хитойлик мутахассислар ҳозирдан биргаликда иш олиб боради.
Цемент заводи билан бир вақтда туманга темир йўл, автомобиль йўли ва коммуникация тармоқлари кириб келади. Бу айни вақтда янги ҳамкорлар ва бошқа турдаги ишлаб чиқариш корхоналарининг ташкил этилишига имкон яратади.
Изоҳ (0)