Қозоғистон президенти Нурсултон Назарбоев Мустақиллик байрами арафасида Остонада давлат мукофотларни топшириш маросимини ўтказди. Бу ҳақда «Tengrinews» хабар берди.
Алия Назарбоевага адабиёт ва санъат йўналишида давлат мукофоти топширилди. Ушбу мукофотга у «Анаға апарар жол» («Онага элтувчи йўл») тўлиқ метражли фильмини яратилишидаги иштироки учун лойиқ деб топилди. Мукофотни топширар экан Президент Алияни ўпиб қўйди.
Аввалроқ, Қозоғистон президенти адабиёт ва санъат йўналишида 2018 йилги мукофотларни топшириш тўғрисида буйруқ имзолаганди. Қозоғистон давлат мукофоти ушбу фильмни яратишда иштирок этган ижодий жамоага ҳам топширилди: фильм режиссёри Акан Сатаев, сценарий муаллифи Тимур Жаксиликов, актриса Алтинай Ногербек, актор Адил Ахметов.
Оқ Ўрдада бўлиб ўтган тақдирлаш маросимида Нурсултон Назарбоев бугун барча идораларда мукофотларни топишириш маросими бўлаётганини қайд этди.
Президентнинг сўзларига кўра, Мустақиллик байрами муносабати билан мамлакатнинг 1600 нафар фуқароси тақдирланган. «Мен уларнинг барчаларини ютуқлари билан қутлайман» — дейди президент.
Изоҳ (0)