Andijon viloyatining Buloqboshi tumanida sement ishlab chiqaruvchi “Shenfen-bridge of friendship” MChJ shaklidagi O‘zbekiston-Xitoy qo‘shma korxonasi qurilishining boshlanishiga bag‘ishlangan tantana bo‘lib o‘tdi. Bu haqda Andijon viloyati hokimligi matbuot xizmati “Daryo”ga xabar bermoqda.
Unda so‘z olgan viloyat hokimi, Oliy Majlis Senati a’zosi Shuhratbek Abdurahmonov dastlab Buloqboshida sanoat mahsulotlari ishlab chiqarish sur’atining pastligi, amaldagi yilning o‘tgan davrida buloqboshiliklarning viloyatdagi ulushi atigi 1,4 foizni tashkil etganligiga yig‘ilganlar e’tiborini qaratdi. Chilustun tog‘lari yonbag‘rida barpo etiladigan yangi korxona bu borada katta o‘zgarishlarga sabab bo‘lishini ta’kidladi.
Davlat rahbarining o‘tgan yili Andijonga tashrifi chog‘ida taqdimot qilingan mazkur loyihaning umumiy qiymati 203,9 million AQSh dollarini tashkil etadi. Qurilish ishlari 18 oyda yakunlanishi ko‘zda tutilmoqda. Muhimi, bu bilan 750 ta ish o‘rni yaratiladi. Korxona ishga tushgach tumanda sanoat mahsulotlari ishlab chiqarish hajmi 5 marotabaga ortadi. Yiliga qo‘shimcha 20 million AQSh dollari miqdorida eksportni amalga oshirish imkoniyati yaratiladi.
Shu o‘rinda qayd etish lozimki, hamkor “Zhejiang Shangfeng Building Materials Co. Ltd” kompaniyasi Xitoydagi 50 ta eng kuchli kompaniyalardan biri sifatida tan olingan bo‘lib, 40 yillik tajribaga ega. Energiya tejamkor va ekologik toza mahsulotlari bilan tanilgan. Bosh maqsad — O‘zbekistonda nomiga munosib do‘stlik ko‘prigini yaratish. Loyiha asosan mahalliy yoshlar bilan amalga oshiriladi. Xitoylik mutaxassislar hozirdan birgalikda ish olib boradi.
Sement zavodi bilan bir vaqtda tumanga temir yo‘l, avtomobil yo‘li va kommunikatsiya tarmoqlari kirib keladi. Bu ayni vaqtda yangi hamkorlar va boshqa turdagi ishlab chiqarish korxonalarining tashkil etilishiga imkon yaratadi.
Izoh (0)