Тошкентда бўлиб ўтадиган «Меҳнат соҳаси истиқболи: Халқаро меҳнат ташкилотининг 100 йиллиги арафасида муносиб бандликни таъминлашга қаратилган саъй-ҳаракатлар» мавзусидаги халқаро конференция муносабати билан 13 декабрь куни Халқаро меҳнат ташкилотининг бош директори Гай Райдер бошчилигидаги делегация Ўзбекистонга етиб келди. Бу ҳақда ЎзА хабар берди.
Делегация таркибидан Гай Райдер билан бирга ХМТнинг Европа ва Марказий Осиё мамлакатлари минтақавий бюроси директори Хайнс Кёллер, ХМТнинг Шарқий Европа ва Марказий Осиё мамлакатлари бюроси директори Олга Кулаева, бандлик масалалари бўйича ХМТ бюроси бош мутахассиси Михаил Пушкин, ХМТ бош директори маслаҳатчиси Одри Эспозито, иш берувчилар фаолияти бўйича ХМТ бюроси бош мутахассиси Владимир Чурович, меҳнат қилувчилар фаолияти бўйича ХМТ бюроси мутахассиси Гоча Александрия, ижтимоий ҳимоя бўйича ХМТ бюроси мутахассиси Ясмина Папа сингари хорижий экспертлар ўрин олган.
Делегация Ислом Каримов номидаги Тошкент халқаро аэропортида Бандлик ва меҳнат муносабатлари вазири Шерзод Кудбиев, Инсон ҳуқуқлари бўйича Миллий марказ директори Акмал Саидов, Савдо-саноат палатаси раиси Адҳам Икромов томонидан кутиб олинди.
Бу ХМТ бош директори Гай Райдернинг Марказий Осиё минтақасига илк ташрифи ҳисобланади.
Ташриф доирасида делегация жорий йилнинг 14 декабрь куни Ташкент Hyatt Regency меҳмонхонасида ўтказиладиган халқаро конференцияда иштирок этади ҳамда Бандлик ва меҳнат муносабатлари, Ташқи ишлар вазирликлари, Касаба уюшмалари федерацияси, Савдо-саноат палатаси раҳбарлари билан учрашиб, музокаралар ўтказади.
Шунингдек, делегациянинг Самарқандга ташрифи режалаштирилган.
Изоҳ (0)