Норматив-ҳуқуқий ҳужжатлар лойиҳалари муҳокамаси порталида «Ўзбекистон Республикаси фуқароларини Тошкент шаҳри ва Тошкент вилоятида турган жойи бўйича ҳисобга олиш тартиби тўғрисидаги йўриқномага ўзгартириш ва қўшимчалар киритиш ҳақида»ги ҳужжат лойиҳаси жойлаштирилди. Бу ҳақда «Халқ сўзи» хабар бермоқда.
Ҳужжат билан турган жойи бўйича ҳисобга олишга доир давлат хизмати кўрсатишнинг маъмурий регламенти тасдиқланиши мумкин.
Фуқароларни турган жойи бўйича ҳисобга олишга доир давлат хизматини кўрсатишнинг маъмурий регламентига кўра, ҳисобда туриш учун фуқаро янги яшаш жойига келган кунидан бошлаб ўн кун муддатда ўзи вақтинча турган жойдаги Давлат хизматлари марказларига (шахсан ўзи келиб) ёки ЯИДХП орқали электрон тарзда мурожаат қилади.
Давлат хизматлари маркази орқали мурожаат қилинган ҳолларда фуқаро ва турар жой эгаси номидан Давлат хизматлари маркази ходими томонидан, ЯИДХП орқали мурожаат этган тақдирда эса, мустақил равишда тегишли шаклдаги сўровнома электрон равишда тўлдирилади.
Сўровнома қуйидаги ҳужжатларга асосан тўлдирилади:
Уй-жой мулкдори ва фуқаронинг паспорти;
Уй-жой ҳужжатлари;
16 ёшга тўлмаган шахслар учун туғилганлик тўғрисидаги гувоҳнома;
контракт бўйича ҳарбий хизматчининг шахсий гувоҳномаси ёки Ўзбекистон Республикаси Қуролли Кучлари зобитининг шахсий гувоҳномаси ва паспорт нусхаси.
Изоҳ (0)