13 декабрнинг асосий янгиликлари — «Дарё» дайжестида.
Шавкат Мирзиёев 13 декабрь куни Қашқадарё вилоятига етиб келди. Президент Шўртан газ-кимё мажмуасининг GTL заводида бўлди. Яккабоғ туманида «Sag agro Yakkabog‘» масъулияти чекланган жамияти томонидан барпо этилаётган ёнғоқзор ва бодомзорларни бориб кўрди. Муборак туманидаги замонавий иссиқхона билан танишди.
***
Бугун, 13 декабрь куни Ўзбекистон Республикаси Олий Мажлис Сенатининг ўн еттинчи ялпи мажлиси бўлиб ўтди. Сенат раиси қонун ҳужжатларининг рус тилида эълон қилинишини давлат тилига ҳурматсизлик деб атади. ССВ руҳий ҳолати бузилган шахсларни аниқлаш бўйича суст ишлаётгани, оқибатда улар томонидан оғир жиноятлар содир этилаётгани таъкидланди. «Ўзбекистон Республикасининг халқаро шартномалари тўғрисида»ги Қонун сенаторлар томонидан маъқулланди. Ўзбекистонда жиноят процессининг барча иштирокчилари қонуний ҳимоя қилиниши белгиланди. Шунингдек, Сенат ялпи мажлисида Жаҳонгир Ортиқхўжаев ва Жамшид Қўчқоров инвестиция учун кураш масаласида баҳслашди.
***
23 декабрь куни Наманганда ноодатий тадбир эълон қилинди. «Наманган ҳайдовчилари» 400 та автомашина иштирокида рамзий арча ясайди. Мазкур тадбирни вилоят Йўл ҳаракати хавфсизлиги бошқармаси қўллаб-қувватлашини маълум қилган. Бундан ташқари, ЙҲХБ автомобиллари ҳам акцияда иштирок этиб, улар машиналар арчасининг юлдузи бўлади.
***
Наманган шаҳрининг «Чорсу» деҳқон бозорига чақирилган тез тиббий ёрдам машинаси бозор дарвозаси қулф бўлгани учун ичкарига киролмай, 15 дақиқа туриб қолди. Бу ҳолатни дарвоза олдидаги «Paynet» шохобчаси ва озиқ-овқат дўкони эгалари ҳам тасдиқлади. Уларнинг айтишича, калит олдинлари ҳар эҳтимолга қарши уларда турган, бироқ мазкур ҳодисадан аввал 10-15 кун давомида уларда берилмаган.
***
Тошкент шаҳрининг Туризм бренди сифатида Тошкент шаҳри ёзуви ҳамда манзараси акс этган логотип қабул қилинди. Мазкур Туризм бренди хорижий ва маҳаллий туризм кўргазмаларида, савдо ярмаркаларида,ташкил этилган турли тадбирларда, Тошкент шаҳри ва маданий объектларига йўналтирувчи йўл хариталарида, гайдбукларда, реклама банерлар ва билбордларида, шаҳарнинг туризм салоҳиятини тарғиб қилувчи видео-роликлар ва кўрсатувларда, туризм объектларида ва унинг атрофида жойлашган савдо расталарида сотилаётган сувенир-совға, кийим-бошлар, миллий маҳсулотларда акс эттириладиган бўлди.
Изоҳ (0)