7 декабрнинг асосий янгиликлари «Дарё» дайжестида.
Тошкент шаҳрида «Tashkent Central Park» кўп тармоқли комплекс қурилиш лойиҳаси амалга оширилади. Лойиҳа Тошкент шаҳар, Юнусобод туманидаги Амир Темур шоҳ кўчаси, Шаҳрисабз ва Истиқлол кўчалари доирасидаги умумий майдони 2,5 гектар бўлган майдонда барпо этилади.
***
Россиянинг «Россия сифат тизими» («Роскачество») ташкилоти Маҳсулотлар сифати синови ва тадқиқотлари ташкилотларининг халқаро ассоциацияси билан ҳамкорликда 2018 йилнинг энг яхши смартфонлари рейтингини тузди. Синовлар натижасида 2018 йилнинг энг яхши смартфони Samsung Galaxy Note 9 бўлиб чиқди. Рейтингнинг иккинчи ва учинчи ўринларидан мос равишда iPhone ХS Max ва iPhone ХS ўрин олган.
***
Беларусь президенти Александр Лукашенко Россия президенти Владимир Путиндан газ транспортировкаси учун нархлар борасида баҳс қилгани учун кечирим сўради. У Евросиё иқтисодий иттифоқи мамлакатлари давлат раҳбарларининг саммитида Путин билан газ нархи масаласида баҳслашган эди.
***
Қашқадарё вилоятининг Шаҳрисабз шаҳрида 7-синф ўқувчиси ўз жонига қасд қилишдан аввал хат ёзиб қолдирган, прокуратура ҳодисани ўрганмоқда. Муҳаммаднинг отаси ўғли хат ёзиб, унда ота-онасини, сингилларини яхши кўришини, синфдош дўстидан крассовка олганини, уни эгасига қайтариб беришлари кераклигини айтганини маълум қилган. Отасининг айтишича, Муҳаммад хатда магнитофон ва бошқа нарсалар ўзиники эканлигини, қолган гапларни эса телефон «флешка»сидан ўқиб олишларини ёзган ва кейин томнинг болорига ўзини осган.
***
«Ўзбекистон» халқаро анжуманлар саройида 7 декабрь куни Ўзбекистон Республикаси Конституцияси қабул қилинган куннинг 26 йиллигига бағишланган тантанали тадбир бўлиб ўтди. Президент Шавкат Мирзиёев ушбу қутлуғ айём билан муборакбод этиб, сиёсий-ҳуқуқий ҳаётдаги ўзгаришлар ҳақида маъруза қилди.
Изоҳ (0)