Qashqadaryo viloyatining Shahrisabz shahrida 7-sinf o‘quvchisi o‘z joniga qasd qilishdan avval xat yozib qoldirgan, prokuratura hodisani o‘rganmoqda. Turon24 voqea tafsilotlarini o‘rgandi.

Foto: Turon24

O‘z joniga qasd qilgan o‘quvchining ism-sharifi – Muhammad Sherboboyev. Ma’lum bo‘lishicha, voqea xorijdagi va O‘zbekistondagi ommaviy axborot vositalarida yozilganidek 28-noyabr kuni emas, 27-noyabr kuni tushdan keyin sodir bo‘lgan. Qolaversa, marhum litseyda emas, balki Shahrisabz shahridagi 1-sonli ixtisoslashtirilgan umumta’lim maktab-internatida aniq fanlar yo‘nalishida tahsil olgan.

“27-noyabr kuni o‘quvchimiz Muhammad Sherboboyevning onasi Mashhura Husanova 1- va 3-soatlardagi algebra va geometriya darslariga kirib, o‘qituvchining dars o‘tish jarayonini kuzatdi, – deydi o‘zini 7-“A”sinf rahbari deya tanishtirgan Alisher Yorboboyev. – O‘qituvchi Bunyod Toshevning dars o‘tishi M.Husanovaga ma’qul keldi. Dars yakunida o‘qituvchining dars o‘tishidan qoniqish hosil qilganini aytdi. Ammo Muhammadning "to‘rt" baho olganidan qoniqmaganini va o‘g‘li “besh”ga o‘qishini xohlashini bildirdi.

Matematika fani o‘qituvchisi Bunyod Toshevning aytishicha, 27-noyabr kuni algebra va geometriya darslariga haqiqatan ham Muhammadning onasi kirib, o‘g‘lining o‘qishini kuzatish maqsadida kelganini bildirgan.

“Muhammadning onasi ham o‘qituvchi ekan. Shuning uchun dars o‘tish jarayonimni kuzatish niyatida ruxsat so‘radi, – deydi matematika fani o‘qituvchisi Bunyod Toshev. – Onasi kelgani sababli dars jarayonida aynan Muhammadga ko‘proq e’tibor qaratgan holda, uning bilimini baholash niyatida ikki marta doskaga chiqardim. O‘sha kuni Muhammad geometriya fanidan “besh”, algebra fanidan esa xatolarga yo‘l qo‘ygani uchun “to‘rt” baho oldi”.

"Muhammadning onasi har safar 6- va 7-soatlarda o‘g‘liga ruxsat berishimizni so‘rab, o‘g‘lini repetitorga qo‘ysa, balki o‘zlashtirib ketar, degan fikrni aytardi, – deydi 7-“A” sinf rahbari Alisher Yorboboyev. – Ammo men har safar onasiga maktabimizda ham yetarli darajada dars berilayotganini, agar o‘quvchiga haddan ortiq o‘qish vazifasi yuklatilsa, u fandan bezor bo‘lib qolishi mumkinligini aytganman. Shu sababli o‘g‘liga ko‘proq o‘zi e’tibor berishi kerak ekani, hali o‘zlashtirib ketishini ta’kidlaganman".

“Muhammadni ham boshqa o‘quvchilar qatori o‘zlashtirishi sust bo‘lgan paytlari ba’zan koyib turardim, – deydi matematika fani o‘qituvchisi Bunyod Toshev. – Yaxshi o‘qisin, degan maqsadda”.

Alisher Yorboboyevning ma’lum qilishicha, Muhammadning otasi 24-noyabr kuni o‘tishi lozim bo‘lgan ota-onalar majlisiga ishi borligi sabab, 2 soat oldin kelib, o‘g‘li xususida so‘raydi. Sinf rahbari esa o‘quvchisining ba’zi fanlardan o‘zlashtirishi past ekanligini bildiradi. Shundan so‘ng 27-noyabr kuni onasi dars tahliliga keladi.

“Muhammad ko‘proq rasm chizishga, nimalardir yasashga qiziqardi”, – deydi Muhammadning sinfdosh do‘sti O‘ktam Ergashev. – U hamma fanlardan yaxshi o‘qirdi, faqat matematikani o‘zlashtirishdan qiynalardi. Onasi maktabga kelgan kuni ham o‘g‘li matematikadan yaxshi baho olmagani uchun xafa bo‘lib ketgan ekan”.

“26-noyabr kuni aynan shu sinf o‘quvchilari bilan mashg‘ulot olib borgandim, – deydi maktab psixologi Nilufar Hamidova. – Test jarayonida o‘quvchilar qatori Muhammadning ham san’atga, rasm chizishga bo‘lgan qiziqishi aniqlangandi. Ammo Muhammadda tushkunlik kayfiyatini sezmagan ekanman. Agar unda ruhiy tushkunlik holati bo‘lganda, o‘sha kuni albatta u bilan alohida tartibda suhbatlashgan bo‘lardim. Chunki har safar test olganimda, aynan tushkunlik holati sezilgan bolalar bilan alohida tartibda ishlayman. Ish uslubim shunaqa”.

“Seshanba kuni (27-noyabr nazarda tutilmoqda) Muhammadning oyoq kiyimi ham yirtilib ketgandi, – deydi Muhammadning sinfdoshi Elchinbek G‘ayratjonov. – Keyin “superkley” olib kelib, yamashga harakat qildik. Nam bo‘lgani uchun oyoq kiyimini yamay olmadik. Shunda Muhammad Javohir degan sinfdoshimizning oyoq kiyimini olib, dars tugamasa ham uyiga ketdi”.

“Muhammadjon onasi kelgan kuni haqiqatdan ham to‘rt soat darsda o‘tirib, keyin ruxsat olib uyiga ketgan", – deydi maktab-internat direktorining ma’naviy-ma’rifiy ishlar bo‘yicha o‘rinbosari Lobar Alimardonova.

Marhumning buvisi nevarasi seshanba kuni darsdan qaytgach, uyga kelganini tasdiqladi. Uning so‘zlariga ko‘ra, Muhammad ovqatini yeb bo‘lgach, molxona tomonga o‘tib, mollariga qaragan.

“O‘sha kuni Muhammad darsdan qaytgan paytda uyda onasi va singillari bo‘lgan, – deydi buvisi. – U ikki marotaba uyga tez-tez kirib chiqqan. Keyin orada bir soatlar hayallab qolgach, onasi izlab chiqqan va voqeaning ustiga borgan".

“Muhammadjon Muhammadjon edi-da, – deydi qo‘shnisi Minglish Gadoyeva. – Hammamizni kuydirib ketdi. U juda aqlli bola edi. Men havas qilardim bu bolaga. Vos-vos deganlari shu bo‘lsa kerakdir-da. Yo‘qsa, shunday namunali oilaning aqlli farzandi bunday ish qilmasdi”.

“27-noyabr kuni qishlog‘imizga tez yordam mashinasi keldi, – deydi “Chuqun” mahallasi raisi Jovli Husanov. – Sal o‘tmay, tuman ichki ishlar bo‘limidan telefon qilishib, voqea xususida bildirishdi. Tezda o‘sha yerga yetib bordim. Borsam, Muhammadning otasini qo‘lida bir enlik xat bor ekan. “Nima bo‘ldi?” deb so‘rasam, u o‘g‘li xat yozib, unda ota-onasini, singillarini yaxshi ko‘rishini, sinfdosh do‘stidan krassovka olganini, uni egasiga qaytarib berishlari kerakligini aytganini ma’lum qildi. Otasining aytishicha, Muhammad xatda magnitofon va boshqa narsalar o‘ziniki ekanligini, qolgan gaplarni esa telefon “fleshka”sidan o‘qib olishlarini yozgan va keyin tomning boloriga o‘zini osgan".

“Haqiqatan ham, xat yozib ketgan ekan, – deydi ism-familiyasini aytishni istamagan Chuqun mahalla profilaktika inspektori. – Ammo xatda nima yozilganidan xabarimiz yo‘q. Xatni prokuratura olgan ekan. Bizga ma’lum bo‘lishicha, bola shahardagi maktabda o‘qigan. Oxirgi paytlarda fanlarni o‘zlashtirishi past bo‘lgani uchun o‘qituvchilari ota-onasini chaqirib, bolaning o‘qishlari sustlashib ketayotganini aytgan”.

Shahrisabz tuman prokurori o‘rinbosari Bobur Bahromovning ma’lum qilishicha, voqea tuman prokuraturasi tomonidan o‘rganilmoqda. Ammo hali hech qanday jinoyat ishi qo‘zg‘atilmagan.

Mahalla raisi Jovli Husanovni marhumning buvisi Chinni Boboqulovaga asoslanib ma’lumot berishicha, seshanba kuni maktabdan qaytgan Muhammadning kayfiyati bo‘lmagan. “Kattasiga (buvisi nazarda tutilayapti) to‘yib ketdim hammasidan” degan gapni aytgan.

“Uydagilari ham xavfsiragan bolaning harakatidan, – deydi mahalla raisi. – Shuning uchun ham yarim soatlar ko‘rinmay qolgach, onasi va kattasi izlashga tushgan”.

“Maktabda oynani sindirgan, degan gap ham bor”, – deydi mahalla raisi Jovli Husanov, posbon Muysin Berdiyev, kotib Bahrom Xurramov. – Qolaversa, vos-vos ham bo‘lgan bo‘lishi mumkin".

“O‘sha kuni maktabda hamshira xonasidagi derazalardan birining oynasi singani rost, – deydi maktab internati direktorining ma’naviy-ma’rifiy ishlar bo‘yicha o‘rinbosari Lobar Alimardonova. –  Ammo OAVda yozilgani kabi Muhammadjon oynani sindirmagan. O‘sha kuni oyna singan payt voqea ustiga o‘zim bordim. Oynani 6-sinf o‘quvchilari Doston Usmonov va Sardor Xushvaqtovlar sindirgani aniqlandi. Shunda 6-sinf rahbari Sarvinoz Nasriddinovaga aytib, aybdorlarning uydagilarini chaqirib, o‘sha kuni oynani tuzatib qo‘ydik".