2 декабрь, якшанба куни Осиё велоспорт конфедерацияси президенти Осама Аҳмад Абдулла Алшафар бошчилигидаги делегация Ўзбекистонга ташриф буюрди.
Ташрифдан кўзланган асосий мақсад 2019 йилнинг 22—28 апрелга қадар Ўзбекистонда бўлиб ўтадиган велосипед спортининг шоссе йўналиши бўйича Осиё чемпионатига тайёргарлик кўриш бўйича амалга оширилаётган ишлар, Осиё чемпионатининг «Йўл харитаси»ни кўздан кечиришдан иборат эди.
3 декабрь куни делегация иштирокида Тошкентда ижроия қўмита йиғилиши бўлиб ўтди. Йиғилишда Ўзбекистонда Осиё чемпионатига тайёргарлик даражаси, мусобақа бўлиб ўтадиган автомагистрал йўлларини ҳолати, амалга оширилиши лозим бўлган ишлар муҳокама қилиниб, таклифлар берилди.
Осиё чемпионати-2019 директори Хофер Roland, Халқаро велосипедчилар иттифоқи вакили Фарҳод Алиев мусобақалар бўлиб ўтадиган Тошкент вилоятига ташриф буюриб, у ерда автомагистрал йўллар ҳолати, меҳмонхоналарни кўздан кечирди.
Маълумот учун, Ўзбекистон велоспорт бўйича тарихда биринчи маротаба Осиё чемпионати ўтказилади. Мазкур Осиё чемпионатида 2020 йил Токиода бўлиб ўтадиган XXXII ёзги Олимпия ва XVI Паралимпия ўйинларига лицензиялар ўйналади. Осиё қиътасидаги 40 га яқин давлатлардан 600 га яқин велоспортчилар иштирок этади.
Осиё чемпионати Ўзбекистондан илк маротаба «Евроспорт» (Eurosport) канали орқали тўғридан-тўғри кўрсатилиши кутилмоқда.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @daryo_sport’га обуна бўлинг!
Каналга қўшилиш учун: @Daryo_sport
Изоҳ (0)