3 декабрь, душанба куни Миллий олимпия қўмитасида Ўзбекистон замонавий бешкураш федерациясининг навбатдан ташқари ҳисобот-сайлов конференцияси ташкил этилди, деб хабар беради МОҚ матбуот хизмати.
Тадбирда Миллий олимпия қўмитаси бош котиби Жасур Матчанов, Ўзбекистон йилқичилик ва от спорти, енгил атлетика, қиличбозлик, сузиш, ўқ отиш федерациялари вакиллари ҳамда оммавий ахборот воситалари ходимлари иштирок этди.
Кун тартибидан ўрин олган асосий масала ташкилотга янги раҳбар сайлаб олишдан иборат бўлди. Федерациянинг аввалги раҳбари Фарруҳ Фазлиев бошқа ишга ўтгани муносабати билан бўшаб қолган лавозимга бунгача Ўзбекистон йилқичилик ва от спорти федерацияси раиси ўринбосари сифатида фаолият олиб борган Баҳром Газиев номзоди илгари сурилди. Конференция иштирокчилари бир овоздан Газиев номзодини қўллаб-қувватлади ва шу тариқа у Ўзбекистон замонавий бешкураш федерацияси раисига айланди.
Маълумот учун, замонавий бешкураш спортида атлетлар бешта йўналиш – қиличбозлик, сузиш, от спорти, югуриш ва пистолетдан ўқ отиш бўйича кураш олиб боради. Мазкур спорт тури илк маротаба 1912 йили Стокҳолм мезбонлик қилган Олимпия ўйинларида дастурга киритилган.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @daryo_sport’га обуна бўлинг!
Каналга қўшилиш учун: @Daryo_sport
Изоҳ (0)