Марғилон шаҳар, Турон маҳалласи, Истиқлол кўчаси, 82‑уй, 30-хонада яшовчи фуқаро М.Сиддиқов (2‑гуруҳ ногирони) Мажбурий ижро бюроси Марғилон шаҳар бўлимига ариза билан мурожаат қилиб, унда яшаш манзилига шаҳар Электр таъминоти корхонаси томонидан эски йилларда 11 миллион сўм миқдорда қарздорлик ёзиб қўйилганлигини, шу масалада амалий ёрам беришни сўраган. Бу ҳақда шаҳар МИБ бўлими ахборот хизмати хабар берди.
Худди шу мазмундаги ариза билан, хусусан яшаш манзилига 18,7 миллион сўм қарздорлик асоссиз қарздорлик ёзилганлиги ҳақида Марғилон шаҳар, Янги Марғилон шаҳарчаси, Наврўз маҳалласи, Ёқут кўчаси, 14‑уйда яшовчи фуқаро М.Содиқова ҳам мурожаат қилган.
МИБ Марғилон шаҳар бўлими томонидан 2 нафар фуқароларнинг мурожаатлари бўлим ходимлари ва бошқа мутахассислар жалб қилган ҳолда обдон текширилганида, ҳақиқатан ҳам ушбу фуқароларнинг манзилларига шаҳар Электр таъминоти корхонаси томонидан бир неча йиллар олдин ортиқча кўрсаткичлар киритиш оқибатида сунъий қарздорлик қўшиб ҳисоблаб келинганлиги аниқланган.
Бўлим аралашуви билан Электр таъминоти корхонасидаги мавжуд дастурга ўзгартиришлар киритилиб, 2 нафар фуқаронинг муаммоси тўлиқ ҳал қилиб берилиб, уларнинг бузилган ҳуқуқлари тикланди.
Изоҳ (0)