Yandex.Погода Ўзбекистонда ёғингарчиликлар харитасини кўрсатишни бошлади, деб хабар беради Spot.
Харитада қаерларда тез орада ёмғир ёки қор ёғиши кўринади. Бундай маълумотлар асосида фойдаланувчилар, масалан, кучли ёмғир шаҳарда ҳам ёғишини ёки уни четлаб ўтишини кўришлари мумкин.
Ёғингарчилик ҳақидаги маълумотлар ўн дақиқалик интервал билан икки соат кейинга мўлжалланган: ёғингарчилик ўн, йигирма, ўттиз дақиқа ва ҳ.к.дан кейин қаерга етиб боришини кўриш мумкин.
Хизматнинг асосий саҳифасида харитани очмасдан ҳам тушуниш мумкин бўлган об-ҳаво огоҳлантиришлари берилади: «Ёмғир ярим соат ичида бошланади» ёки, масалан, «Яқин икки соат давомида қор аралаш ёмғир тинмайди».
Ёғингарчиликлар харитаси нафақат ёмғир остида қолмасликка ёрдам беради, балки уни кузатишнинг ўзи ҳам жуда қизиқарли. Масалан, эндиликда ёмғир қанча вақт ичида Тошкентдан Наманганга етиб боришини ҳисоблаш ёки ёмғирли булутлар қайси томонга кўпроқ ҳаракатланишини аниқлаш мумкин.
Ёғингарчиликлар ҳақида хабар беришда Yandex бир неча дақиқалик интервалда оладиган сунъий йўлдош тасвирларидан фойдаланади. Maxсус ўргатилган нейронли тармоқ атмосфера фотосуратларини қайта ишлайди ва ёғингарчилик соҳаси ҳаракатини башорат қилади.
Ўзбекистон аҳолиси iOS ва Android тизими учун ишлаб чиқилган Yandex ёки Yandex.Погода дастурларида, шунингдек, yandex.uz/pogoda манзилида ёғингарчиликлар харитасини кўришлари мумкин.
Yandex.Погода хизмати Meteum технологияси асосида ишлайди. У метеостанциялар, сунъий йўлдош, Yandex.Xarita ва бошқа манбаларга асосланган ҳолда ишлайди.
Аввал Meteum маълумотларни башорат қилишнинг классик услубларидан фойдаланган ҳолда қайта ишлайди, сўнгра эса натижани компьютер технологияси ёрдамида аниқлаштиради. Бу маҳаллий об-ҳаво маълумотини кўча ва ҳатто уйгача бўлган аниқликда олиш имконини беради.
Изоҳ (0)