Ўзбекистонда хорижликлардан «тонировка» учун йиғимни ундириш тартиби белгиланди

Хорижий давлатларнинг ойналари туси ўзгартирилган (қорайтирилган) енгил автотранспорт воситаларининг Ўзбекистон Республикаси ҳудудига вақтинча кириши ва транзит ҳаракатланиши учун мажбурий йиғимларни ундириш тартиби тўғрисидаги низом Адлия вазирлигида давлат рўйхатидан ўтказилди. Бу ҳақда «Ҳуқуқий ахборот» канали маълум қилди.

Низомга мувофиқ, хорижий давлатларнинг ойналари туси ўзгартирилган (қорайтирилган) енгил автотранспорт воситалари деганда, хорижий давлатларда рўйхатда турган, йўловчиларни ташиш учун фойдаланиладиган, ўриндиқлар сони 8 тадан ошмайдиган, вазни 3,5 тоннагача бўлган, олд, ён ва орқа ойналаридан бири ёки бир нечтасининг туси ўзгартирилган автотранспорт воситалари тушунилади.

Ойналари туси ўзгартирилган (қорайтирилган) енгил автотранспорт воситаларининг Ўзбекистонга вақтинча кириши ва транзит ҳаракатланиши учун 15 АҚШ доллари миқдорида чегара божхона постидаги банк кассалари орқали мажбурий йиғим ундирилади. Кассада квитансия расмийлаштирилади ҳамда унинг бир нусхаси ҳайдовчига берилади.

Йўл-патруль хизмати ҳайдовчилардан мажбурий йиғимлар ундирилганлигини текшириш учун квитансия нусхасини кўради, мажбурий йиғимлар тўланмаганлиги аниқланганда маъмурий жавобгарлик чоралари кўрилади.