Жиззах вилояти Янгиобод тумани давлат солиқ инспекцияси билан Бош прокуратура ҳузуридаги Мажбурий ижро бюроси туман бўлими ҳамкорлигида солиқ қарздорлигини ундириш бўйича изчил ишлар амалга оширилмоқда. Бу ҳақда ЎзА хабар берди.
Тасдиқланган режага мувофиқ, жорий йил ноябрь ойида туманда солиқ тўловчилардан 13,4 миллион сўмлик қарздорлик ундирилди. Бир неча марта огоҳлантиришларга қарамай, солиқларни ўз вақтида тўламаётган айрим тадбиркорларга нисбатан суд қарори асосида қонунга мувофиқ мажбурий чоралар қўлланилмоқда.
Масалан, Зомин туманлараро иқтисодий судининг 31,7 миллион сўмлик қарздорлик бўйича чиқарган ижро варақасига асосан «Янгиобод Агросервис МТП» масъулияти чекланган жамиятига қарашли Nexia-3 русумли автомашина хатловга олиниб, аукцион орқали сотувга қўйилди.
Худди шундай чоралар тумандаги «Ҳавотоғ асали» масъулияти чекланган жамиятига, «Исломжон Анорбой» хусусий корхонасига нисбатан ҳам қўлланилиб, солиқ қарздорлиги ундириб олинди.
Солиқ тўловларининг кўпайишида фақат мажбурлов чоралари эмас, тадбиркорлик фаолияти учун эркинликлар кенгайтирилгани ҳам муҳим омил бўлмоқда. Хусусан, Ўзбекистон Президентининг 2018 йил 27 июлдаги «Тадбиркорлик субъектларининг ҳуқуқлари ва қонуний манфаатларини ҳимоя қилиш тизимини янада такомиллаштириш чора-тадбирлари тўғрисида»ги фармони асосида фаолияти қайта тикланган тадбиркорларнинг қарздорлиги ҳисобдан чиқарилиши солиқ қарзлари камайишига олиб келмоқда.
Мазкур фармонга асосан якка тартибдаги тадбиркорлар Достон Исмоилов ва Раббимқул Шукуровнинг тадбиркорлик фаолиятини қайта тиклагани сабабли уларнинг 4,5 миллион сўмлик солиқ қарзи ҳисобдан чиқарилди. Бу имкониятдан фаолиятини тиклаётган бошқа тадбиркорлар ҳам фойдаланмоқда.
Зомин туман соолиқ инспекцияси ходимлари тадбиркорларга солиқ соҳасида амалга оширилаётган ислоҳотлар, янгиликлар бўйича кенг тушунтириш ишлари олиб бормоқда. Кўрилаётган чора-тадбирлар самарасида солиқ тўловчиларнинг қарздорлиги йил бошига нисбатан 121,7 миллион сўмга камайди.
Изоҳ (0)