Тошкент давлат педагогика университети «SMART университет»га айланади

Низомий номидаги Тошкент давлат педагогика университетида Туркиянинг Informascope компанияси билан ҳамкорликда «SMART университет» лойиҳаси амалга оширилади. Бу ҳақда Олий ва ўтра махсус таълим вазирлиги матбуот хизмати хабар берди.

Жорий йилнинг 26 ноябрь куни университет ректори Шавкат Шарипов ва Informascope компанияси бошқарув директори Қуванч Чинар иштирокида мазкур лойиҳани амалга ошириш бўйича музокаралар бўлиб ўтди.

Тошкент давлат педагогика университетида замонавий талаблар даражасида «SMART университет» элементларини жорий этиш бўйича бир қатор амалга оширилиши лозим бўлган вазифалар белгилаб олинди. Жумладан,

• Университетда фойдаланишда бўлган турли хил ахборот тизимлари, компьютер дастурларини ўзаро интеграция қилиш;
• Фойдаланувчиларни ягона идентификация тизим орқали, исталган жойдан университет ресурсларидан фойдаланишларини йўлга қўйиш;
• Бугунги кундаги қурилмаларга мос иловалар яратиш эвазига мавжуд тизимлардан, шунингдек ахборот ҳамда ўқув таълимий ресурслардан фойдаланиш географиясини кенгайтириш, фойдаланувчиларга қулайлик яратиш;
• Талабалар билимини назорат қилишнинг автоматлашган тизимини жорий этиш;
• Битирув малакавий ишлари, магистр PhD ва DSs даражаларини олиш учун ёзилган диссертацияларини, «плагиат»га текшириш автоматлаштирилган тизимини ва бирламчи маълумотлар базасини шакллантириш;
• «SMART» технологиялардан фойдаланиш бўйича профессор-ўқитувчилар ва талабалар билимларини доимий ошириб бориш, янги технологияларни таълим жараёнига жорий этиш бўйича «мастер-класслар» ташкил қилиш.

Туркиянинг Informascope компанияси нашр ишлари, шунингдек, кутубхона маҳсулотлари ва хизматлари кўрсатувчи хорижий йирик ва етакчи компания саналади. У ўзининг кўп йиллик тажрибасига таяниб, жаҳон миқёсида информацион эҳтиёжларни қондиришга қаратилган кенг қамровли ва индивидуал ечимлар ишлаб чиқади.

Маълумот учун, «SMART» айни пайтда технология оламида кенг қўлланилувчи ибора бўлиб, Specific (ўзига хос), Measurable (ўлчаб бўладиган), Attainable (эришиб бўладиган), Relevant (долзарб), Time-боунд (аниқ муддатли) сўзларининг қисқартмасидан олинган.

Мазкур лойиҳа олий таълим муассасасининг ўқув, илмий ва бошқарув жараёнларини ахборотлаштиришга қаратилган маълумотлар базаларини, ахборот тизимларини яратиш, улардан фойдаланиш, хизматлар кўрсатиш ҳамда бошқа ахборот тизимлари билан интеграция қилинадиган олий таълим муассасасининг «SMART университет» ягона платформасининг асосий тамойилларини белгилаб беради