Самарқандда 3 йил давомида 978 килограмм героинни Россияга ўтказган жиноятчи устидан суд ҳукми ўқилди

Жиноят ишлари бўйича Самарқанд шаҳар судида судья Зарифа Аҳмедова раислигида 2005 йилнинг июль ойидан 2008 йил декабрь ойининг охирига қадар 978 килограмм героин гиёҳвандлик воситасини Россия Федерациясига ўтказишда иштирок қилган Шуҳрат Шариповга оид жиноят иши кўриб чиқилди. Бу ҳақида «Дарё» мухбири Фарҳод Норбўтаев хабар бермоқда.

Очиқ суд мажлисида Шуҳрат Шарипов бошқа шахслар билан тил бириктириб кўп миқдордаги гиёҳвандлик воситаларини контрабанда қилиш ҳамда уларни қонунга хилоф равишда сотишда иштирок этиш жиноятларини содир қилганлиги аниқланди.

Жумладан Шуҳрат Шарипов 7 та ҳолатда 978 килограмм героин гиёҳвандлик воситасини Ўзбекистон Республикаси чегарасидан контрабанда йўли билан Қозоғистон Республикаси орқали Россия Федерациясига ўтказишда иштирок қилган.

Суд мажлисида содир этилган жиноят атрофлича муҳокама қилиниб, Ш. Шариповнинг жиноят иши юзасидан суд ҳукми ўқилди. Суд ҳукмига кўра Ш.Шарипов Ўзбекистон Республикаси Жиноят Кодексининг 246-моддаси 2-қисми, 273-моддаси 5-қисми ва 28, 25, 273-моддаси 5-қисми билан айбдор деб топилиб, Жиноят Кодексининг 59-моддаси тартибида 17 йил озодликдан маҳрум қилиш жазоси тайинланди.