Чилонзор туманида Тошкент шаҳар давлат солиқ бошқармаси томонидан 2019 йил 1 январдан соддалаштирилган солиқ тўлови тизимидан умумбелгиланган солиқ тизимига ўтаётган солиқ тўловчилар учун семинар ўтказилди. Бу ҳақда «Дарё»га бошқарма ахборот хизмати хабар берди.
Унда Ўзбекистон Республикаси Президентининг «Ўзбекистон Республикасининг солиқ сиёсатини такомиллаштириш концепцияси тўғрисида»ги Фармонига мувофиқ, келгуси йилдан йиллик айланмаси 1 миллиард сўмдан ошган ёки йил давомида белгиланган чегаравий миқдорга етган корхоналарни умумбелгиланган тартибда солиқ тўлашга ўтказиш тартиби ҳамда солиқларни тўлаш муддатлари ҳақида батафсил маълумотлар берилди.
Маълумотларга кўра, жорий йилнинг 9 ойи якунлари бўйича Чилонзор туманида йиллик айланмаси 1 млрд сўмдан ошган 655 та корхона мавжуд. Уларга 2019 йил 1 январдан умумбелгиланган солиқларни тўлашга ўтишлари зарурлиги ҳақида хабарномалар жўнатилган. Жорий йилнинг 27 ноябрь ҳолатига 261 та корхона қўшилган қиймат солиғи тўловчиси сифатида рўйхатдан ўтишга ҳам улгурган.
Бугунги кунда солиқ тўловчиларга қўшимча қулайликлар яратиш мақсадида «Солиқ сервис» давлат унитар корхонаси ишга туширилди. Корхона ходимлари томонидан тадбиркорлик субъектлари вакилларига ҳисоботларини тайёрлаш ва топшириш, бюджет билан муносабатларини тартибга солиш, электрон ҳисобварақ-фактураларни юритиш қоидалари бўйича бепул хизмат кўрсатилади.
«Солиқ қонунчилиги меъёрларини амалиётга татбиқ қилиш бўйича қўшимча саволлар юзага келганда, 24 соат узлуксиз ишлайдиган Call-марказга 71-202-32-82 ёки қисқа «1198» рақамига қўнғироқ қилиш мумкин», — дейилади хабарда.
Изоҳ (0)